Nutiziale culturale

Tempu scemu, u novu dischettu di Voce Emuzione

Fundatu in u 1998 da a pruduzzione Ricordu, u gruppu Voce Emuzione cuncoglie pareche di e più belle voce di l'isula addunite ingiru à un prugettu culturale è pulifonicu. In u 2021, hè esciutu u so novu è 19u dischettu Tempu scemu. In stu gruppu, a ghjente pò presentà un prugettu à i canterini, cantà una stonda cun elli, parte è vultà. Una furmazione chì pò fà principià i giovani canterini nanzu d'emancipassi. Stu dischettu hà 20 tituli, 17 in cantu è 3 in strumentale. I canterini sò originari di sfarente regione di l'isula cù testi scritti in pumuntincu è cismuntincu. Cantanu dinù cù u so parlà, a so intunazione. Ogni canzona parla di fatti d'attualità : a natura, a lingua corsa, Pasquale Paoli, l'amore, a maffia, e custruzzione... Una diversità di testi è di voce cù un interpretu pè ogni testu. Stu dischettu hè dinù una nuvità maiò per via di a so strumentazione filarmonica avendu numerosi strumenti: e chitarre, e percussione, u piano, e corde cù viulini è cuntrabasse o ancu i rami. Infine, grazia à a so discugrafia maiò, u gruppu cuntinueghja à luce in Corsica è in altrò.