Nutiziale culturale

U cantu di i canti cù Patricia Gattaceca è Marina Luciani venneri u 17 d’ottobre à 6 ore è mezu in a catedrale Santa Maria di Bastia

Ghjè un dialogu d’amore trà a pastora, a Sulamita, è un pastore o forse u rè Salomone. L’intensità di l’amore è di a passione ind’una scrittura puetica piena à simbulismu è emuzione. Hè chjamatu dinù “Cantu di Salomone” è serebbe di l’epuca di stu rè (970-931 nanz’à Cristu) chì puderebbe esse l’autore. U cantu di i canti hè presentatu cum’è u più anzianu è u più bellu di i canti d’amore. Ghjè dinù un libru feministu nanzu chì sta parolla esisti. A pastora, a Sulamita, hè à u centru di u libru. Vicina di u rè Salomone, vole esse libera. Per quessa, ricusa a so piazza in u harem di u rè pè ritruvà u pastore. L’opera hè dinù muderna. U so aspettu eroticu hè statu à mumentu datu un prublemu è u testu hà mancatu di sparì. Ma hè statu rimessu in a Bibbia per via ch’ellu illustrava l’amore di Diu pè u so populu ancu sì ùn hè micca un testu religiosu. Tempi fà, pastori è paisani corsi innamurati ne recitavanu i versi 

Patriza Gattaceca hà scrittu e parolle di u dischettu. Hà cumpostu e meludie cù Jean-Bernard Rongiconi. U Cantu di i canti hè un’adattazione in lingua corsa di u Cantique des cantiques, una seria di puemi è canti d’amore. Unu di i ghjuvelli di a litteratura universale. Ci face ciuttà in e radiche di u Mediterraniu, face una leia trà cantu è litteratura in lingua corsa chì hà ispiratu numerosi canterini, frà elli u famosu Alain Bashung. Numerose traduzzione sò state fatte cum’è quella di Norbert Paganelli in lingua corsa è quella di l’artista Magdalith chì hè piaciuta à Patrizia Gattaceca. Altri cuncerti cum’è quellu di venneri seguiteranu nant’à u cuntinente è in festivali di cantu sacru in u Mediterraniu. Intantu, v’aspettanu A canterina Patrizia Gattaceca è a pianista Marina Luciani pè “U Cantu di i canti” venneri u 17 d’ottobre à 6 ore è mezu in a catedrale Santa Maria. I biglietti in vendita nant’à bastia.corsica.