Nutiziale culturale

“Paisaghji mediterranii”, una mostra di u Centru Mediterraniu di a fotografia à u museu di Bastia sin’à l’11 di marzu

Fora di e mostre ch’ellu presenta l’annu sanu, u Centru Mediterraniu di a fotografia, creatu in u 1990, crea spazii di scontru è di dialogu suciale difendendu un mudellu culturale è artisticu in leia cù e rialità cuntempuranee ind’un mondu sempre di più divisu. Dice Marcel Fortini, direttore di u centru stabilitu in E Ville di Petrabugnu: “difendimu a creazione è l’amparera di u spiritu criticu di i giovani cunsiderenu a fotografia cum’è una pedagugia di u sguardu nant’à a sucetà”. In st’annu 2026, festighjemu i 200 anni di a creazione di a fotografia è omu s’accorge chì, da l’analogicu à u numericu, suddisface sempre di più l’esigenze di a creazione.

U Centru mediterraniu di a fotografia hè u pruprietariu d’un grande patrimoniu di trè mila opere d’artisti avendu stili è origine sfarenti nant’à a Corsica, u Mediterraniu è in altrò. U percorsu di a mostra “Paisaghji mediterranii” hè fundatu nant’à cinque sequenze di fotografie, documentarii è riporti : « Paisaghju, viaghju », « In u paisaghju », « Paisaghji, misteri », « Paisaghju, Storia », « Paisaghju in ruvine ». Sò presentate l’opere originale di Miguel Aleo, Jane Evelyn Atwood, Roberto Battistini, Elina Brotherus, Dominique Degli Esposti, Stéphane Duroy, Joan Fontcuberta, Julie Ganzin, André Kertész, Salvatore Ligios, Mathieu Micheli, Walter Niedermayr, Paulo Nozolino, Mathieu Pernot, Claude Philip, Serge Picard, Lola Reboud, Maddalena Rodriguez-Antoniotti, Valérie Rouyer, Albano Silva Pereira. Hè impurtante di mustrà l’opere originale ind’un mondu induve l’intelligenza artificiale riprisenta un veru fenomenu suciale chì scunvoglie a nostra pratica è trasfurmeghja a nostra percezzione di u mondu.

A mostra « Paisaghji mediterranii » sin’à l’11 di marzu à u museu di Bastia, da u marti à u sabbatu, da 9 ore à meziornu è da duie ore à cinqu’ore.