Nutiziale culturale

A Chjama, novu dischettu di I Chjami Aghjalesi

Dodeci anni dopu à u so primu dischettu, a furmazione fundata in u 1977 da militanti culturali di u quartiere San Ghjiseppu in Bastia, prupone cù 'A Chjama' un ripertoriu musicale trà creazione è tradizione rispettendu l’impegnu è l'ADN di u gruppu. U so itinerariu artisticu chì hà sempre mischjatu i canti di rivolta, a pulifunia, un stile folk à a musica tradiziunale. Dodeci anni dopu à Sventulerà, stu novu discu vole esse un caleidoscopu, una successione di cumbinazione cù stili sfarenti in leia cù pagine di a storia isulana è d’altrò. 18 tituli pè mantene u fiume di a tradizione cù opere cuntempuranee. L’occasione di mette à l’onore una nova generazione di giovani è ancu di zitelli pè una forma di rinnovu, ma sempre cù u spiritu militante. A modu soiu, quasi tutti i tituli di u dischettu, Si muverà, Quante, L'ultime cunfine, Sò dì... mette in musica l’impegnu militante di u gruppu. Certi dinunzianu i corsi chì vendenu a so terra, a sparizione di a lingua, altri chjamanu un’emancipazione cullettiva o difendenu i prigiuneri pulitichi.

L’opera hè dedicata à Petru Guelfucci, chì si n’hè andatu à l’altru mondu un annu fà è à Yvan Colonna, tombu di marzu scorsu à a prigiò d'Arles. A chjama rimanda dinù à temi più universali è storichi, da l'epupea d'Achille Murati in l’isula di Capraia sin’à e cunfine di l'imperu mungolu di l’epuca di Genghis Khan. Un’allusione à stu persunagiu storicu imaginatu da Patriziu Croce, in u filu d’altri persunagi storichi cantati da i chjami cum’è Attila o u navigatore Christophe Colomb. A Chjama hè un’opera generosa, aperta à versi è musiche di u mondu d’avà ma arradicata in u più prufondu di u mare nostrum. A nova generazione di cantadori serà presentata à u teatru di Bastia, i 3 è 4 di marzu. Cum’è una successione dopu à un’opera musicale maiò di quasi 50 anni.