Nutiziale culturale

E Medievale di Livia i 5, 6 è 7 di settembre

Evenimentu maiò di l'Alta Rocca, organisatu da l’associu Paplar (Pè l’animazione è a prumuzione di Livia è di l’Alta Rocca) sta manifestazione trasfurmeghja à Livia in cità di u medievu. Sfilate, spettaculi, cumbatti, teatru, mostre, cunferenze animazione ritmeranu sta festa. Parechje mostre illustreghjanu sta perioda nant’à i Casteddi Cinarchesi, Rinucciu della Rocca, i signori Biancolacci è altri persunagi famosi di st’epuca. Sò pruposti attelli nant’à l’armature corse cù un’iniziazione à l’arte di l’eraldicu, l’usi di e piante in sta Corsica di tandu. Avemu dinù a presentazione in particulare d’arme di quell’epuca da Pierre-Henri Weber di l’associu Castiddari. Mostre nant’à e carte marine di u medievu. E medievale di Livia sò dinù un’invitazione à scopre in modu pedagogicu a perioda chì và da l’Antichità à u Rinascimentu è a ricchezza di u patrimoniu edificatu nant’à u nostru territoriu in sta perioda.

Frà e truppe invitate, ci hè Imaziren, a tribù di l’omi liberi, chì rivene à u paese di u focu cù novi spettaculi. Eletta migliore cumpagnia di Francia in a cumpagnia “arte di u focu”, Imaziren prupone ogni annu nuvità ancu di più perfezziunate cù pirtutennia, curegrafia è custumi unichi pè una sperienza visiva è auditiva di prima trinca. In quant’à e nuvità, “Ephemeria Circa - U soffiu di u lupu” chì conta a storia onirica d’una tribù di i spiriti salvatichi ghjunti da un’altra epuca. D’altrò, i campamenti Lilymayi seranu in centru di u paese, è ci serà u turneu di a cumpagnia “Gueule du loup”. A Corsica serà riprisentata dinù da Kyrnos Events, i so ballarini è trampalaghji è Bahikaja allora chì u gruppu Gras jambons animerà parechji cuncerti medievali. Infine, u mercatu medievale di l’artigiani mette in risaltu tradizione è sapè fà lucali. Cusì, cù più di 130 artisti, e Medievale prumettenu un evenimentu festivu è culturale, chì compie d’incantu cù un show nant’à u tettu di u museu di l’Alta Rocca stu venneri sera. 

Altre infurmazione : www.medievalesdelevie.com