Nutiziale culturale

Terza edizione di Swing in Sulinzara da l’11 à u 13 di settembre

Quist’annu, stu festivale serà pè u più feminile cù e canterine corse Doria Ousset, Patrizia Poli, Elisa Tramoni, Francine Massiani. Quattru voce pè una serata originale è stili varii chì purteranu a bandera di l’identità corsa. A u prugramma dinù a canterina spagnola Paloma Pradal, candidata di l’emissione The Voice in u 2022. Cusì, Swing in Sulinzara prupone un’immersione ind’a cultura spagnola cù un’artista in leia dapoi sempre cù u mondu di l’arte. Hè figliulina di u pittore Carlos Pradal, figliola di a canterina zingara Mona Arenas è di u canterinu Vicente Pradal. Discendente di u famosu puetu Federico Garcia Lorca, ballarina è teatrina. 

Infine, u canterinu corsu Fanou Torracina pè u so swing corsu unicu durante u primu cuncertu l’11 di settembre in chjesa di Sari-Sulinzara à 9 ore menu quartu. A listessa ora pè tutte e serate. U 12, u flamenco di Paloma Pradal nant’à u portu di Sulinzara. U 13, in u listessu locu, e voce magnifiche di Patrizia Poli, Doria Ousset, Francine Massiani è Elisa Tramoni. Infine, pè compie l’ultima serata, l'energia di u gruppu Blu Mood.