Nutiziale culturale

I 33esimi scontri di BD in Bastia da u 26 à u 29 di marzu è da u 30 di marzu à u 3 d’aprile à a mediateca di I Fulelli

Tutti l’anni nanzu e feste di Pasqua, “BD in Bastia” hè una stonda culturale maestra. Si scumparte à u centru culturale Una Volta, carrughju César Campinchi, à l’arsanale, à u museu, tramindui in citadella è dinù à a mediateca di I Fulelli. Quist’annu, l’affissu di a manifestazione hè statu creatu da Elene Udsin è ne truverete fasce figurative à u museu di Bastia. Sò in u libru illustratu “Détroit-Roma”. A u prugramma, seranu presentati i travaglii di cullegianti diretti da Audrey Spiry, pittrice, illustratrice, autrice..  cù a so prossima publicazione “U giardinu d’Eden”. D’altrò, si puderà vede u libru “I surrisi di u vinu” natu da l’idee è da e passione cruciate di Yann Diolo è di Matthias Bourdelier. Un libru illustratu pè ritruvà a qualità di u vignetu corsu. 

Altra mostra, quella di i militanti di SOS Mediterraniu, “En vie”. Ci vole à sapè chì l’organisazione SOS Mediterraniu hà salvatu, dapoi u 2014 annu di a so creazione, 43 000 migranti da un annigamentu. U festivale BD in Bastia hà previstu dinù dui spettaculi : u primu “I D’Iles” imaginatu da Audrey Spiry è Ferdinand Doumère. Ghjè un viaghju da un’isula à l’altra ingiru à una riflessione nant’à u mondu, nant’à u raportu à l’altri è à a natura… U secondu hè à u centru culturale Una Volta, “Une chose formidable” di Rebecca Dautremer, creatu à parte da u persunagiu di Jaconimus chì pensa à a so vita passata durante un picculu opera nant’à una grande amicizia. L’artista face sfilà scene comiche induve s’affaccanu amiche è amichi di Jaconomus. Altru generu presente : u manga è a disegnatrice Camille Broutin pè a so seria “Yon”. U tema hè un gruppu di giovane prigiunere ind’un vechju internatu chì deve battesi cù mostri. Citeremu ancu l’opere di Isabelle Chatellard è di Hubert Ben Keamoun, autori di u “Grand, très grand tour de manège”. In più, una retruspettiva artistica hè prevista. Infine, si rimarca l’opera umuristica “Punk à sein” di Magali Le Huche nant’à u sugettu seriu, u so cancheru. 

In quant’à a mediateca di I Fulelli, accuglierà a manifestazione da u 30 di marzu à u 3 d’aprile. A u prugramma, scontri, scuperte, creatività è immersione in l’universu passiunante di a BD. Una stonda di prima trinca permettendu à numerosi zitelli di u territoriu di campà una sperienza culturale ricca, di ghjocu è ispirante. Attelli, scambii cù passiunati, scuperta di stili è di storie… Tante occasione d’incuriusì i più giovani è di stimulà u so imaginariu. Participeranu Audrey Spiry è Marie Boisson. Serà presentata a mostra di Marie Boisson “Bianca et la forêt des parents égarés”.