Nutiziale culturale

Mostra 'Anthropocène' à a pulverera di a citadella d’Aiacciu sin'à u 30 d'aprile

Un’opera di l'artista franco-allemana Lou Rat-Fisher, in cullaburazione cù una classa di prima di u liceu Fesch è u so prufessore Jean-Laurent Arrighi. L'Anthropocène hè u nome prupostu pè un’epuca geologica chì averebbe principiatu quandu l'influenza di l'essere umanu nant’à a geolugia è l’ecosistemi hè diventata significativa ind’a Storia di a Terra. Anthropocène significheghja « epuca di l'essere umanu », a parolla hè stata creata à a fine di u XXu seculu da u meteorologu è chimistu di l'atmusfera Paul Josef Crutzen, premiu Nobel di chimia in u 1995 è da Eugene Stoermer, biolugistu. Sta perioda geologica averebbe principiatu à a fine di u XVIIIu seculu cù a rivuluzione industriale è venerebbe dopu l’Holocène.

Lou Rat-Fischer, primurosa di l’imbusche eculogiche di a nostra epuca, s’hè interessata à a diversità biologica di a costa è e prublematiche in leia cù u mare. In u filu di a so scuperta d’Aiacciu è di i scambii cù i liceani, una creazione s’hè fatta à pocu à pocu. Avemu riprisentazione di lucerne brune pinte nant’à u cartone à l’inchjostru di China. Sta specia animale hè minacciata in generale ma prutetta nant’à u litturale corsu. L’artista ricupereghja robba è cù un modu di spressione senza caccià elementi. Lascia dunque l’imperfezzione, l’etichette affaccà sott’à a pittura. In daretu di i pesci avemu infurmazione scientifiche nant’à u statu attuale di u mare Mediterraniu. St’infurmazione pinte cù grande lettere facenu pensà à iscrizzione di manifestazione.

A tempu, l’artista prusegue una seria di ritratti principiati l’annu scorsu in Auvergne. Si tratta di grandi disegni fatti cù a penna chì provanu à cuntà u scunvuglimentu di e nostre sucetà di fronte à u cambiamentu di u mondu, a nostra rispunsabilità d’umanu. Pè cumpetà a so opera artistica, u culore “turchinu” di u Mediterraniu rivene spessu trà i scambii di Lou Rat-Fisher cù a scola di Jean-Laurent Arrighi. Cusì, avemu dinù una mostra di centinaie di petre turchine rialisate da l’elevi.