Nutiziale culturale

Nova versione pè Sunemu.net

Pè i so 18 anni, stu situ di prima trinca pè i musicanti corsi, creatu da Sébastien Antoniotti, ingiuvanisce cù una versione più muderna è e so numerose nuvità. L’ogettivu hè sempre d’esse un locu di spartimentu ingiru à a musica grazia à numerosi accordi di chitarra, sistemi di scrittura musicale è altre infurmazione nant’à l’artisti isulani. Anc’oghje, numerosi artisti mandanu un mail à u creatore di Sunemu, quand’elli escenu un dischettu, pè mette e nove canzone nant’à u situ. Grazia à ellu, numerosi giovani musicanti anu amparatu à sunà a chitarra. Sta nova versione hè adatta à i smartphone è avemu numerose canzone in più. Una bibliuteca d’accordi hà da esse creata pè i principianti. Cusì saperanu cumu piazzà e so dite nant’à u manicu di a chitarra. Vulendu adattassi à tutte e brame di i musicanti, Sébastien Antoniotti chì hà creatu sta nova versione cù l’agenza web ch’ellu dirige dapoi parechji anni, hà vulsutu dà a pussibilità di traspone l’accordi, vale à dì pudè cambià a tunalità d’una canzona pè adattalla à a so voce. 

Rimarchemu dinù a funziunalità di sfilamentu automaticu permettendu di cantà una canzona senza bisognu d’una persona pè fà falà a pagina à pocu à pocu. Omu puderà creassi un contu permettendu di fà un classore di cantu o mette e so canzone in a rubrica di i favuriti pè ritruvalle più prestu. Ultima nuvità : Sunemu hà da prupone oramai playlist adatte à e periode di l’annu, per esempiu ci hè in stu mumentu una lista di canti di Natali. Infine, a cunsultazione di u situ ferma di rigalu.