Nutiziale culturale

Zonza : un prugettu pè a memoria di a Resistenza

A cumuna di Zonza induve si trova un museu di a Resistenza manda una chjama à l’altre cumune pè un prugettu di reta intercumunale di memoria di a Resistenza. Cusì, vole ritruvà e testimunianze permettendu di ricurdassi di a storia lucale di i nostri anziani daretu à l’evenimenti mundiali. Zonza hà principiatu una dimarchja pè fà di u so museu un “museu di Francia” à celu apertu induve, in ogni locu impurtante di a Resistenza, si trovanu infurmazione diverse pè creà cusì un giru culturale. Stu travagliu hà bisognu di tutte e cumune, di a CDC. U prugettu averà u so sensu cù azzione fatte è da fà versu i giovani. A cumuna hà decisu di fà una candidatura vicinu à l’Educazione Naziunale pè andà in e scole, fà vene i sculari, rialisà sperienze stimulante pè i giovani nant’à a storia di a Resistenza è di i so eroi cunnisciuti o menu cunnisciuti. A scola di Santa Lucia di Purtivechju hè stata digià numata Jean Nicoli, quella di Zonza piglierà u nome d’un resistente di u paese mortu durante a liberazione di a Corsica in core di u paese.

U cumitatu di cundutta di a rifundazione di u museu hè sustenutu da Marie-Jeanne Nicoli, presidente di u CESEC (cunsigliu ecunomicu, suciale, ambientale è culturale di Corsica). Ci truvemu a CDC, a DRAC, l’università, u retturatu, associ d’anziani cumbattanti è soprattuttu un cumitatu scientificu cuncogliendu storichi specialisti di a perioda è direttu da Sylvain Gregori, cunservatore di u museu di a Resistenza.