Nutiziale culturale

U spettaculu 'Inventà Dumane' di u gruppu Una Fiara Nova, venneri u 29 di maghju in a sala rossa di Purtivechju, à 8 ore è mezu

Pè a prima volta, stu gruppu canta in sta sala è ci presenta u so novu spettaculu. Una Fiara Nova hè natu in u Rustinu in u 2019. “Inventà dumane” presenterà canzone assestate di i dui primi dischetti, trà pulifunie è canti strumentalisati è trè canzone nove. Matteo Di Meglio ne canterà una. I musicanti seranu più numerosi chè di solitu. Stu cuncertu serà dinù un’occasione di cercà un novu publicu è di cantà in u più pussibule di sale in Corsica pè ghjudicassi è micca solu l’estate. Bramosi di difende a so musica è a lingua corsa, Una Fiara Nova vole creà “una dimarchja orientata versu l’avvene”.

U ripertoriu evucheghja a Corsica d’oghje, a so storia, e musiche orientate versu a Corsica di dumane. Difatti, ci vole à parlà d’avvene o ancu di Mediterraniu pè sparte assai cù i populi d’altrò è, pè difende una lingua, ci vole à falla sparte è falla cunnosce aldilà di e nostre cunfine.  Infine, u so novu dischettu escerà à principiu di l’annu 2027 cù quindeci canzone nove trà pulifunie è canzone strumentalisate.