Nutiziale culturale

« Tic Tac Tectonique – Quandi a terra move », a nova mostra bislingua di a Casa di e Scenze in Bastia sin’à u 17 di lugliu 2027

Vi prupone di scopre è di capì i meccanismi di terramoti, a so misura, ma dinù i mezi di prevenzione è di prutezzione. Una mostra chì vene da Lausanne in Svizzera è chì si scumparte in trè temi : “Chì ghjè un terramotu ?” “Cumu caratterisallu è misurallu” ? “Omu si ne pò prutege ?” In più, hè presentata a cumpusizione di a Terra, a tettonica di e placche, a sparghjera di l’onde è ciò chì ci vole à fà s’ellu accade un terramotu. A prima parte presenta l’internu di a terra pè capì megliu perchè trema. Ind’a seconda parte, s’ampara à caratterisà è à misurà un terramotu cù parechje sperienze pè spiegà cumu si pò misurallu, cun chì apparchju è chì si misura esattamente. Si tratta quì di u calculu di a magnetudine è di l’epicentru. Si pò dinù osservà u funziunamentu d’un sismumetru (strumentu scientificu chì misura i muvimenti di a terrra è e vibrazione). Infine, a terza parte spiega cumu prutegesi da i terramoti cù novi metudi di custruzzione pè migliurà a resistenza di i bastimenti. Ghjè a custruzzione parasismica. 

In sta mostra, grazia à attelli interattivi, u publicu puderà cunnosce a sparghjera di l’onde sismiche, aduprà un sismugrafu, calculà a magnetudine d’un terramotu. Sperienze è ghjochi permettenu d’usservà tutti l’aspetti di st’evenimenti geologichi. Dunque, un altru esempiu pè demucratisà a cultura scentifica à prò di tutti.