Nutiziale culturale

Felì è u giru storicu pè i so 35 anni di carriera

Felì hà datu à a cultura corsa canzone frà e più famose. In i so cuncerti, a passione è l’emuzione si mischjanu à ogni nota. A so discugrafia cuncoglie 12  dischetti in studio è in live, più di 150 canzone cumposte cù u so amicu di sempre, u ben di Ghjuvan’Terramu Rocchi, Ghjacumu Fusina o Patrizia Gattaceca. Hè altru chè un artistu. Hè l’imbasciadore passiunatu d’una cultura unica chì e meludie francanu u tempu è a sputichezza traversanu e generazione, cummovenu i cori in Corsica è in altrò. Ci hè cù u so populu è a so terra una leia inalterabile, l’apertura è u spartimentu artistichi, parolle maestre pè Felì, chì hà multiplicatu e cullaburazione in u filu di l’anni, prima cù u gruppu A Filetta in l’anni ottanta è dopu cù I Surghjenti. Sperienze chì l’anu furmatu è li anu datu a brama di a cumpusizione. Cusì, hè natu u primu dischettu Campà in u 1989, è à tempu u principiu di a so cullaburazione fusiunale cù Ghjuvan’Terramu Rocchi. U canterinu hà sappiutu ancu ellu mette u so talente à prò di l’altri artisti piunieri di a cultura corsa cumpunendu musiche pè Petru Guelfucci in e canzone « A puesia hè libertà » è « A mio musa », Antoine Ciosi (« Mulinu di sognu » è « Primu amore »), Canta u Populu Corsu (« Ch’ellu canti u populu corsu ») o ancu Jacky Micaelli, Sekli, Ghjuvan’Francescu Luciani o Diana Saliceti. Avemu dinù cullaburazione cù canterini d’altrò. Per esempiu a canzona corsa è occitana “Terre” cù Nadau, u famosu artistu gascone bearnese avendu 50 anni di carriera;  a canzona « Quand’è tù balli »  in corsu è spagnolu interpretata cù u percussionnistu cubanu Piro Barrios. Apertura cù l’Irlanda fendu un prugettu d’un generu novu principiatu in u 2023. Cusì, Felì cumpone a musica di u prossimu filmu documentariu di Jean-Pierre Alessandri (ind’è Ramona Pruduzzione). Intitulatu « Dancing in Corsica : les comédiens », conta a vita di 8 cumedienti amatori di Roglianu chì decidenu di diventà teatrini adattendu l’opera d’un autore irlandese. U filmu deve esce à a fine di l’annu 2024.

A tempu, Felì cù Scola in Festa, a scola di cantu chì addunisce più di 350 elevi, di musica è d’amparera di a lingua corsa ch’ellu dirige, hà cumpostu a canzona Mediterraniu in u quadru d’un prugettu maiò è novu, natu da u so scontru cù Aadel Essaadani, persunalità di a vita culturale maruccana, presidente di l’associu « Racines », è Franck Lidon, direttore delegatu à l’azzione è risorse in u Mediterraniu ind’è Radio France. Mediterraniu hè cantata cù un orchestru filarmonicu pè diventà l’innu di u Mare Nostrum. Scritta è cumposta da Felì è Ghjacumu Fusina, deve esse tradutta in lingue mediterranie : talianu, sardu, grecu, spagnolu, catalanu, occitanu, berberu, arabu, turcu o ancu u francese pè un’iscrizzione à u patrimoniu mundiale di l’UNESCO.

Pè sti 35 anni di carriera, cuncerti sò previsti l’11 di maghju à u teatru di Prupià, u 13 è u 14 à u centru Carlu Rocchi di Biguglia, u 16 à l’Empire in Aiacciu, st’estate da l’8 à u 18 d’aostu, u 14 di nuvembre in Ecchisi à u Pasino Grand, u 15 à u Pasino d’Hyères è u 19 di nuvembre à u casino di Parigi induve i più famosi artisti di u mondu anu cantatu. Più di 2 ore di show rializatu da 25 persone, frà quesse 10 musicanti. U gruppu di cantu feminile Isulatine canterà pè a prima parte nant’à tutte e date di u giru in modu originale durante una piccula opera teatrale di macagne è di pulifunie nanzu di fà i curisti di Felì. Dopu, interpreteranu e so più famose canzone è ancu sei nove, frà quesse « Una vita cusì », adattazione di « Quand j’étais chanteur » di Michel Delpech è parechje altre surprese !