Nutiziale culturale

U catalogu di a mostra “Corsica 39-45 I Corsi è a seconda guerra mundiale', museu di Bastia

L’annu scorsu u museu di Bastia presentava a mostra “Corsica 39-45 I Corsi è a seconda guerra mundiale” in u quadru di l’ottantesimu anniversariu di a liberazione di l’isula. Oramai,  u magnificu catalogu di sta mostra vi permette di ritruvà quasi 500 ogetti, ogetti d’arte, documenti, busti, uniformi d’epuca, stratti di giurnali, arme, vestiti, ogetti di a vita currente… Da i chjassi di a Resistenza à l’occupazione taliana, a cultura americana cù a ghjunta di i famosi GI, i strazi di un’isula fora di u mondu è sottumessa à u raziunamentu. Cusì, si pò trasmette a memoria.

Avemu dinù a paura di a cunquista taliana di a Corsica, u statutu strategicu di l’isula pè l’Aliati, a participazione di i Corsi in l’Armata di Liberazione, a situazione terribule di i prigiuneri di guerra di u Stalag VB, l’insurrezzione di u primu dipartimentu francese liberatu d’ottobre 43. Sò stati racolti ogetti chì contanu u campà di e famiglie, scunvoltu da u cunflittu, a puvertà di a ghjente è chì campava à straziera cum’ella pudia. Truvemu in particulare e cullezzione di l’associu Sintinelle chì raccoglie l’ogetti in leia cù a seconda guerra. Si pò dì ch’ellu ci era un sistemu D à l’usu corsu. D’altrò, i Corsi scoprenu i prudutti cunsumati da l’armata americana è l’american way of life. Ciò chì annunzia a sucetà di cunsumazione chì si sparghjerà più tardi.

U catalogu hè accumpagnatu di cuntribuzione scientifiche : per esempiu “Les Corses à la veille de la seconde guerre mondiale, une histoire politique ballottée par le contexte international” da Jean-Paul Pelegrinetti, “La Corse dans la politique irrédentiste de l’Italie fasciste” da Deborah Paci, “César Campinchi, un parlementaire corse face à l’Italie fasciste”, da Jacques Bartoli, “La revue Femmes de Corse, un témoignage éclairant de la condition et de l’engagement feminins” da Alexandra Moretti, “La captivité des prisonniers de guerre corses, une histoire oubliée 1940-1945” da Sylvain Gregori…