Nutiziale culturale

A mostra “L'Altru Mondu, La Mort dans l’écrit” sin’à l’8 di marzu à l’Archivii di Corsica in Bastia

Una mostra chì mette in risaltu numerosi documenti scritti, frà quessi pezze scarse, in quant’à a morte è e so cunsequenze à u livellu amministrativu è successurale. A morte, elementu maestru di u prucedimentu di a vita, hè una rialità chì s’affacca prestu in i riti, documenti assai diversi cù l’apparizione di a scrittura. In sti documenti, ci sò quelli chì sprimenu riflessione o sintimenti di fronte à a morte in generale o a perdita d’una persona ch’omu tene caru. Avemu i scritti religiosi è filosofichi, amministrativi è ghjuridichi. Quì, si tratta di custattà è infurmà nant’à a rialità di a morte di a persona è e so cunsequenze nant’à i vivi, in particulare nant’à a trasmissione di i bè. Ghjè una manera di sensibilisà u publicu à a natura publica di sti documenti chì seranu aduprati da i cercadori. Sò preziosi pè ricerche storiche o genealogiche, è i studii in storia suciale. 

In st’occasione, l’associu Corsica Genealugia hà datu ceppi, sti registri induve i nutari redattavanu l’originali di l’atti nutariati. In Corsica, l’arrigistramentu di e morte, nant’à atti d’inumazione s’affacca solu à principiu di u 17 seculu. A mostra presenta in particulare u più anzianu registru di e sepulture cunservatu in Cismonte. Quellu di u paese di Muratu apertu in u 1613. 

In a seconda metà di u 18u seculu, a legislazione francese in Corsica face trasferì i registri paruchjali tenuti da a Chjesa à u statu civile di a merria. In quant’à u testamentu, era un attu capunanzu orale. A u medievu, hè diventatu un attu scrittu, nurmalmente stabilitu davant’à un nutariu in u mondu mediterraniu. In stu quadru, avemu un esempiariu di u famosu decretu Miot di u 10 di ghjugnu di u 1801 in quant’à i diritti d’arrigistramentu. Avemu dinù ritratti di musulei. Sti monumenti funerari permettenu d’arradicà un gruppu suciale in u so rughjone, a morte in u paisaghju è a vita d’ogni ghjornu.