Nutiziale culturale

I 40 anni di l'Arcusgi festighjati sabbatu u 27 d'aprile à u Palatinu d'Aiacciu à 8 ore è mezu

U gruppu L'ARCUSGI hè felice di prupone un spettaculu novu à u Palatinu d'AIACCIU. Dapoi a so nascita, 40 anni fà in u rughjone di Bastia, L'ARCUSGI viaghja à nant'à u caminu apertu da i primi gruppi culturali di u Riacquistu. L'ARCUSGI canta a Corsica, u so populu, a so terra, a so cultura, a so lingua è i so diritti à l'autodeterminazione. In l'anni Ottanta Quattru / Ottanta Cinque, u so nome (datu da Nunziu GRISONI) hè statu sceltu in umagiu à i suldati di Pasquale Paoli, armati d'Arcusgi (petites arquebuses), ch'anu cumbattutu l'armata francese in u XVIIlesimu seculu. Fidu à e so idee, L'ARCUSGI mantene a so strada, sempre listessa, è ferma sulidariu in i so canti cù i populi in lotta, fendu una piazza impurtante inde e so creazione nove à u Paese Bascu, di sicuru, ma dinù à a Catalunia, a Scozia è d'altri à vene. L'ARCUSGI hà a brama di ritruvà u so publicu per pudè sparte a so passione di u cantu, campendu, una volta di più, stonde d'amicizia è di fratellenza.

À prestu à nant'à a scena di u Palatinu d'AIACCIU.