Nutiziale culturale

L'ochju di a luna, a nova aventura di Pirru è Ricuccata

Hè esciutu u quintu libru di Pirru è Ricuccata, e storie di l'orsu è di a topa à l’edizione Realità. Sò libri musicali cù i so dischetti. Pirru è Ricuccata ghjunghjenu in pieghja. Per seguità a so questula, anu da piglià e strade di u Fium’Orbu, d’Aleria è di a pieve di u Castellu. I nostri amichi, buschendu u Pinzachju è u Cornu Sacru, caminanu sottu à l’ochju di a luna cù e voce di Anna Rocchi, Natalina Vasta-Simonetti, Pierre-Laurent Santelli, Tittò Limongi, Andria Fazi, Frédéric Antonpietri, Anghjulu Mari, Doria Ousset è Paul Turchi-Duriani chì hà scrittu a storia, a musica magnifica di Bernard Ferrari, e fiure di Fabien Mariani.

Cù Pirru è Ricuccata, l'associu Realità ci prupone un'immersione in lingua corsa, per i zitelli è i maiò, ind'e ricchezze di u patrimoniu, l'animali è i lochi chì rispechjanu l'anima di sta terra. Ghjè un arnese pè fà scopre u patrimoniu è a ricchezza di a lingua cù u ghjocu è a pedagugia. A storia d’un orsu è d’una topa chì si passa in Corsica è chì a sorte face incontrassi nant’i chjassi di u patrimoniu isulanu. Per quessa, vanu d’un locu à l’altru, d’un scontru à un altru. In più, a pratica viva di a nostra lingua corsa indè i duppiami è a scrittura, u frisgiu di e fiure, a musica muderna è ritmata, s’adduniscenu in stu libru muciale à l’attenzione di e creature ma dinù di i maiò per offre un racontu tremendu cù parechji livelli sfarenti di lettura. Una storia chì si prulonga nant’u net grazi’à un’appiecazione numerica.

Pruduttu à 100% in Corsica, incù 100% d’attori lucali di u mondu di l’intrapresa o di a cultura, Pirru è Ricuccata hè u fruttu di u matrimoniu di a mudernità è di a tradizione.