Nutiziale culturale

Medialingua.corsica : una piattaforma in immersione à prò di a cultura

L’amparera di a lingua corsa ma dinò tuttu ciò chì tocca à a cultura isulana, hà pigliatu una strada nova cù a piattaforma « Medialingua.corsica » iniziata in i scagni di Via Stella. S’agisce, in fattu, di 200 ducumenti audiovisivi ch’eranu stati fatti da u Canopé di Corsica (l’anzianu CRDP) è da France 3 Corse Via Stella è messi à dispusizione di u publicu, ch’elli siani i sculari, i parenti, l’insegnanti o tutti quelli chì serianu interessati da sapè ne di più intornu à a lingua è a cultura corsa. « Hè una piattaforma chì adunisce e video di France 3 Corsica, spiega Petru Antò Beretti, capiprughjettu à u Canopé di Corsica, ma dinò quelle di u Canopé chì, tuttu u mondu a sà, travaglià per a cumunità educativa in giru à tuttu ciò chì pò tuccà a lingua è a cultura corsa. »

Aldilà di u cuntestu linguisticu o culturale, l’arnese numericu piglia un’impurtanza maiò in issa demarchja. « Truverete, aghjusta un capimachja di u Canopé, parolle chjave da sfruttà e tematiche, rinsignamenti nantu à una disciplina, un mumentu di storia, ecc…Un arnese faciule da aduprà à prò di a cumunità educativa in generale. »

À stu puntu quì, una cunvenzione hè stata zifrata da Rémi-François Paolini, rettore di l’Accademia di Corsica è Sylvie Acquaviva, direttrice regiunale di Via Stella. « Hè un mumentu impurtante, preciseghja u rettore, hè l’educazione à i media è l’infurmazione da accumpagnà i nostri elevi è insegnanti à a pruduzzione, ghjust’à puntu, di i cuntenuti audiovisivi. Hè dinò una messa à dispusizione di risorze per e classe, masimu in lingua corsa cù issa piattaforma chì apre l’accessu à una diversità maiò. »

Fora di a qualità di e video pruposte, l’arnese hè abbastanza faciule d’accessu cù un’indessazzione pratica. « À u Canopé, ripiglia Petru Antò Beretti, avemu piuttostu un publicu di sculari ma, à tempu, prupunimu ducumenti più generali cum’è i famosi « Tempi fà » o tante altre emissione, pensu, per indettu à « Tandu » ma dinò pruduzzione nove ». I cuntenuti permettenu di sfuglià più di quaranta anni di l’evoluzione di a Corsica in tutti i duminii : cultura, lingua, storia, ecunumia, patrimoniu, sport, geugrafia, suciale, vita in paese, musica... « U scopu serà d’aghjustà è d’indessà tutti l’anni video nove... Sébastien Antoniotti, bislinguu è passiunatu di lingua corsa, hè statu incaricatu di tuttu ciò chì tocca à u numericu. »

Tutta a squadra di u Canopé di Corsica s’hè impegnata à prò d’issu prughjettu, ma dinò quella di France 3 Via Stella è masimu Albinu Buteau, incaricatu di a cumunicazione è difensore di a lingua corsa, Sylvie Acquaviva è ancu Thierry Pardi, u novu direttore di a prugrammazzione. « Un prughjettu di primura à prò di u serviziu publicu, spiega a direttrice, u sviluppu di a lingua corsa face parte di u nostru ADN... »

Sin’à d’avà, u travagliu di u Canopé ghjuvava à l’inseme di a cumunità pedagogica. Cù iss’arnese novu, s’hà da apre à un publicu monda più largu. U Canopé (CRDP), ellu, travaglia nantu à prughjetti linguistichi in lingua corsa è furmazione cuntinua dapoi u...1977 cù ghjente cum’è Ghjuvan Micheli Weber, oghje à a retirata, Battì Paoli, Mariadumenica è Stefanu Predali è un inseme di 15 persone.

Origine : Journal de la Corse