Nutiziale culturale

Murtoriu, in a corte di u palazzu di i guvernatori in Bastia, venneri u 22 di maghju à parte da 9 ore è mezu

U spettaculu in corsu è francese ispiratu da « Murtoriu – Ballade des innocents » di Marc Biancarelli. Hè statu adattatu da Pierre Savalli è in corsu da Marc Biancarelli. Cù Jeremy Alberti, Charly Martinetti, Sampiero Medori, Nicolas Poli, Violaine Nouveau è Stefanu Cesari.

Librariu intermittente è scrittore micca cumpiitu chì a vita sentimentale hè un fiascu, Marc-Antoine Cianfarani campa fora di u mondu ind’un paisolu di a muntagna corsa. Da custì assiste à l’abbottu di un’isula chì pate tutte e forme di snaturazione. L’omu hè contru u cumpurtamentu di i so cuntempuranei chì, nant’à a costa, si cumprumettenu ind’un materialismu à più pudè. In fatti, « Murtoriu », ghjè a morte d’un mondu, di una Corsica anziana marturiata da guerra di u 14. Impregnata di viulenza, di morte è d’amarezza, l’opera entre quantunque ind’una dinamica di riflessione, quella di un’isula chì ùn finisce più di more, chjusa in e so derive è cuntradizzione. Sta creazione teatrale hè cumplessa è ricca, sputicamente corsa, fundata nant’à u nostru territoriu è a so lingua. Ghjè dinù un testu chì franca i particularismi è tocca à l’universale.