Nutiziale culturale

« La Corse des années 50, le temps de l'espoir » di Jean-Paul Cappuri, Jean-Richard Graziani et Jean-Marc Raffaelli, à l’edizione SAS Coletta

L’anziani giurnalisti di Corse-Matin vi facenu ciuttà, cù un’impaginatura di Xavier Grimaldi è ritratti di u fondu Tomasi, ind’una decennia di trasizione in l’isula. Contanu l’evenimenti di sta perioda grazia à raconti ogni tantu surprendenti è un’iconografia ricca. Dopu à un libru di prima trinca nant’à Claude Papi, i trè culleghi anu decisu di percorre ancu di più a Corsica di tempi fà. Stu libru tratta dunque in 9 capituli di l’attualità isulana di l’anni cinquanta. Econumia, pulitica, detti è fatti, cultura, sportu, trasportu, sparizione, vita oghjinca, religione. A principiu di l’anni 50, a Corsica medicheghja e ferite di a seconda guerra mundiale. Dopu à l’orrore, i morti, a Corsica entre ind’una perioda di speranza cum’è ellu hè mintuatu in u titulu. L’autori anu scontru quelli chì anu campatu sta perioda d’una Corsica assai rurale, pè una dimensione umana più chè d’enciclupedia di u libru.

Evenimenti di st’epuca sò stati rammentati. In u 1954, Henri Chevenée avia ottenutu u tempu u più cortu di u mondu d’apnea in u gofu di San Fiurenzu. Dopu, un trattatu internaziunale era statu signatu trà a Corsica è a Sardegna à principiu di l’anni 50, premizie di u mercatu cumunu secondu Jean-Richard Graziani. St’ultimu conta cun intusiasmu a visita in u 1954 di Monsignore Angelo Giuseppe Roncalli, u futur Papa Ghjuvanni 23. Ea statu invitatu cum’è nunziu apostolicu à e ceremunie di a Madonna di Lavasina è, induve’ellu passava, a folla stridava “Evviva u Papa!”. Un’altra persunalità s’hè affaccata in Corsica, in Ghjirulatu : a regina Lisabetta 2 d’Inghilterra. U fotograffu di l’epuca, u famosu Toussaint Tomasi, avia fattu una fiura di a regina in pantalone dice Jean-Marc Raffaelli. St’ultimu ramenta dinù u rolu di i corsi durante a seconda guerra, vicinu à u generale De Gaulle, è l’aiutu à a resistenza. U generale ch’hè ghjuntu in Corsica in u 1958. Hè citatu dinù l’esiliu di u rè di u Maroccu, Mohammed V.