Nutiziale culturale

A Guardia corsa papale

S’ella hè stata ufficialmente creata à principiu di u 17u seculu, a Guardia corsa papale esistia digià toccu l’ottesimu. Mercenari, suldati rinumati, sti corsi eranu stati scelti da u papa Leone III pè curà i muri di Roma.  A cumunità corsa ci campava in u quartiere di u Trastevere è avia ancu a so chjesa : a basilica di San Crisogono, chjamata in talianu chiesa nazionale dei corsi. In tuttu, millaie di corsi chì, durante i seculi, si sò impegnati in a vita di a capitale taliana ma dinù è soprattuttu di a Santa Sede. Sò stati custretti di parte in Roma o ancu Venezia per via di l’invasione diverse in l’isula. U so curagiu è i so talenti sò rinumati pè a guardia di u Santu Patre. St’ultimu sapia ch'i Corsi erani ghjenti valurosi, cumbattante, chì manighjava bè l'arme. 

Oghje ghjornu, u ricordu a guardia corsa papale si mantene grazia à u travagliu di l’associu di listessu nome creatu da Iviu Pasquali. Li tenia in core di falla rinvivì. Un ci vole micca à scurdassi chì a Corsica hè una terra vaticana. E leie cù Roma sò tamante è micca solu à livellu religiosu. Quallà, i corsi anu creatu una cunfraterna chì esiste sempre oghje ghjornu. Anu participatu à l’evuluzione di Roma. Cusì, l’associu Guardia corsa papale si rende in Roma pè celebrà a Madonna Fiumarola cù l’arciconfraternita del Carmine. Una cunfraterna creata da i Corsi in Roma à u XVu seculu. Antoine Tramini, unu di i membri, spiega.  'C'hè a prucissiò ind'a cità, dunqua in tuttu u quartieru di u Trastevere, Dopu, a famosa prucissiò nant'à u fiume Tevere parte incù a Madonna è si ricodda tuttu u fiume cusì sin'à insù pà ghjunghja sin'à u quartieru corsu è infine si riparta cantendu. Sò dui ghjorni maravigliosi.'

In u filu di i seculi, e leie trà a Corsica è u Vaticanu si sò strinte o distese ma sicuramente chì, cù a ghjunta di u papa Francescu in Aiacciu, si rinfurzeranu.