Nutiziale culturale

A ghjuria di u libru corsu hà fattu a so selezzione. L’autori riceveranu u premiu dumenica l’8 d’ottobre in Siscu. Sò stati dunque scelti pè l’opere in lingua corsa : “Seranu Puesiole? La traversée” di Patrizia Gattaceca è l’opera musicale “Pirru è Ricuccata, L’ochju di a luna” di Paul Turchi Duriani è Fabien Mariani. In lingua francese “Tonì Casalonga, d’arte è d’impegni” di Vannina Bernard-Leoni à l’edizione Albiana. Dopu, “Mangeurs de monde” di Jean-Michel Neri à l’edizione Omara.

 

Seranu Puesiole? La traversée” di Patrizia Gattaceca. L’autora arricchisce a riflessione nant’à a leia trà a puesia è u cantu è a difficultà di distingue i dui. Stu libru presenta dinù e so ultime pruduzzione discugrafiche. Hè una manera di cunnosce a puesia di Patrizia. Omu s’arricorda quandu puesia è cantu eranu adduniti. Dopu, Pirru è Ricuccata, l’ochju di a luna. Un’opera musicale in a cullezzione Pirru è Riuccata permettendu à i zitelli di scopre u patrimoniu isulanu è a lingua corsa cù testi di Paul Turchi Duriani illustrati da Paul Mariani. Un libru pruduttu sanu sanu in Corsica cù numerosi attori culturali è di l’intrapresa pè una vera immersione ind’a tradizione è a mudernità di l’isula.

 

L’opera di Vannina Bernard-Leoni presenta l’itinerariu di Tonì Casalonga, u famosu pittore, scultore è scenugraffu, artistu emblematicu di u Riacquistu. A dimensione persunale è sputica di stu libru scrittu in cullaburazione cù l’artistu hà cunvintu a ghjuria. Infine, Mangeurs de monde di Jean-Michel Neri criticheghja a culunisazione è e so cunsequenze nant’à a natura. St’ultima hè quì un persunagiu cù una persunalità murale.