Nutiziale culturale

Appellamanu, Ghjochi nustrali, ghjustre è usanze festie

Stu novu libru di Petru Casanova, à l'edizione Alain Piazzola, ùn hè micca solu una racolta di ghjochi esciuti da a tradizione rurale. Ghjè un'illustrazione di a riprisentazione di u Mondu percepitu è resu dapoi l'internu di l'isula. A spressione libera d'un imaginariu cullettivu usservatu cusì spessu ind'una distanziazione ogettiva. Una fonte d'estru cuntempuraneu è ancu una chjama à resiste à l'unifurmizazione culturale duminente. U Ghjocu hè à tempu amparera cullettiva è sperienza individualizata, sempre rinnuvellate, à l'iniziu d'un patrimoniu immateriale sminticatu : l'arte di sprime a so appartenenza à i Cumuni. Simu tutti invitati à ghjucà è à disegnà i circondi d'un Cumunu induve si cunfondenu osservadori è osservati, umani è micca umani, anime è elementi naturali in un 'Paese' induve campanu inseme u lucale è l'universale.