Nutiziale culturale

Corto Maltese traduttu in corsu

U persunagiu di fascia figurativa, Corto Maltese, parla oramai u corsu. Ceccè Lanfranchi hà traduttu “La ballade de la mer salée” diventata “U cantu di u mari salitu”, à l’edizione Parti des oiseaux-Casterman. Corto Maltese hè un marinaru sulitariu, creatu da Hugo Pratt in u 1967, chì scumbatte contr’à e timpeste nant’à i mari di u mondu. Ceccè Lanfranchi hè un lettore di Corto Maltese dapoi a so prima aduliscenza. Hè maltese, dunque hà una dimensione mediterrania palesa. Ghjè un aventurieru rumanticu, un viaghjadore infiacchevule chì porta in ellu un imaginariu.

In stu racontu, Corto face riferenza à sfarenti populi, isule perse, affondi terribuli cù parechje tematiche cum'è a culunizazione, a pirateria, a libertà. À l'orizonte, s'induvina a prima guerra mundiale. Corto Maltese, trà malincunia è durezza, dà u ritimu d'una storia cummuvente. In u travagliu di traduzzione, si tratta di fà passà à u megliu a bella eluquenza di u persunagiu, a parolla di i cugini Pandora è Caïn Groovesnore, di Rasputinu, u terribule navigadore... è tutti l'altri.