Voce Nustrale

Nutiziale culturale

Corsica
17 di dicembre

De Pascal Paoli à Napoléon Bonaparte, aux sources d’une pensée politique novatrice

Stu libru di Marie-Thérèse Avon-Soletti, à l'edizione Alain Piazzola, hè u risultatu di travaglii di ricerca durante parechji anni pè sbuccà nant'à u custattu d'una filiazione trà Pasquale Paoli è Napulione Bonaparte. E so qualità d'omi di Statu anu pruduttu in e duie epuche un'opera fundatrice maestra. À u XVIIIu seculu, u generale Pasquale Paoli crea un Statu direttu da una Custituzione originale da u 1755 à u 1769, annu di a nascita di Napulione. St'ultimu, ancu s'ellu hè mandatu giovanu nant'à u cuntinente pè i so studii, rammenta cun intusiasimu sta sperienza custituziunale in u 1789. Napulione Bonaparte, diventatu capu di Statu, hà i listessi riflessi, e listesse aspirazione spieghendu l'originalità di a so pulitica. 

Dui omi di Statu strasordinarii ch'ùn si ponu classificà, fora di e mode di u so tempu, è capace à trasfurmà una situazione cumprumessa in manera di rinnuvà una sucetà. Pasquale Paoli cunnosce e tradizione isulane è, frà elle, e tradizione riligiose, mariale, franciscane, vaticane, è l'altre tradizione cumunitarie. A so fedeltà li hà permessu di firmà arradicatu in sta mentalità, a so intelligenza pulitica hà fattu cullà ste tradizione à livellu di u Statu è a so forza intellettuale hà messu in usu una duttrina veiculata da ste tradizione, quand’ella era sminticata nant'à u cuntinente. A Custituzione di a Corsica s'hè fundata nant'à sta duttrina: quella di dirittu naturale. Perchè certi Corsi oghje ghjornu cercanu sempre nant'à u cuntinente ciò chì u generale Paoli hà trovu in Corsica è chì, ghjust'appuntu, ùn si trova inlocu nant'à u cuntinente ? Perchè u generale Paoli si lascerebbe guidà da l'idee cuntinentale, tutte assulutiste, fora di quelle di Montesquieu è Locke per esempiu, allora ch’ellu crea un regime fundatu nant'à l'accunsentu è a participazione attiva di tutti, micca solu durante l'elezzione ma ancu ind'a vita d'ogni ghjornu postu chì a lege creata da l’Assemblea generale di a Nazione ùn pò supranà e tradizione pupulare ? Perchè troppu Corsi credenu à idee cuntinentale di u XVIIIu seculu distruttrice di a so mentalità, disprezzendu e so tradizione ? A Corsica deve amparà à u cuntinente ciò ch'ellu hè un regime di libertà, soprattuttu à st'omi di u XVIIIu seculu chì ùn anu mai pussutu pruducene manc'unu. L'isula ferma unu di i pochi paesi à avè messu in pratica a duttrina di dirittu naturale. Ind'un paese senza strada, senza soldi è in piena guerra, hà sappiutu edificà un regime equilibratu, intelligente, custruttore, è chì deve tuttu à e so tradizione religiose, pulitiche, famigliale è cumunitarie.

In quant'à Napulione Bonaparte, hà campatu dapoi a so aduliscenza nant'à u cuntinente marcatu da l’assulutisimu, ch'ellu sia religiosu cù u gallicanisimu o puliticu cù a munarchia assuluta è u spiritu di i Lumi. L'omu hè firmatu sempre impregnatu d’assulutisimu à l'incuntrariu di Pasquale Paoli chì hè partigianu di a duttrina di dirittu naturale. Eppuru, Napulione Bonaparte ùn hè micca d'accunsentu, nant'à numerosi punti, cù a pulitica in usu nant'à u cuntinente. Parechje azzione di a so pulitica si ritrovanu ind'a Corsica custituziunale di Pasquale Paoli: a vuluntà di pace cù l’unità, u rispettu di a mentalità di u populu, u penseru d’una ghjustizia uguale per tutti è l’aspirazione à une sucetà fundata nant'à u meritu, senza ideolugia, senza distingue e persone. Sti cinque punti, chì ùn si ritrovanu in altrò, formanu u puntellu di u regime, ch'ellu sia di a Corsica custituziunale, di u Cunsulatu è di l’Imperu. L'istituzione corse anu ispiratu a creazione istituziunale di Napulione chì hà fundatu a Francia muderna è chì ne forma sempre i puntelli dapoi più di 250 anni. 

Cultura

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza