Nutiziale culturale

Entre histoire officielle et mémoire populaire di Marcandria Peraut, edizione Le Bord de l'eau-Spondi

A parte da sfarenti esempii ricchi in archivii, empirichi è iconografichi esciuti da u territoriu isulanu, ghjè una presentazione di a memoria in Corsica da u XVIIIu seculu à a nostra epuca. Dopu avè cunfruntatu a storia ufficiale, sparta è insignata inde e cumemurazione, u discorsu, a scola…. à e riprisentazione pupulare di u passatu, l’autore studieghja a quistione di a fabricazione di a memoria.

Palesa un intrecciu di raconti chì insistenu nant’à l’usu puliticu di e grande persunalità è famiglie di l’isula. D’altrò, stu studiu interrugheghja u raportu particulare chì a Corsica è i Corsi anu cù l’eroe. Infine, ci truvemu una rumpitura trà u discorsu puliticu è istituziunale isulanu chì cita sempre e persunalità eroiche di l’isula, simbulu d’un passatu gluriosu, è a memoria pupulare induve spunta u ricordu d’una vita rurale è à straziera.

Marcandria Peraut hè duttore in culture è lingue regiunale à l’università di Corsica. Specialisatu in a storia è l’antropolugia isulane, hè oghje ghjornu postdutturente à a casa francese d’Oxford è à l’Università di l’Antiglie induv’ellu studieghja e rilazione è e circulazione trà a Corsica è e Caraibi da u XVIIIu à u XXIu seculu.