Nutiziale culturale

Ernaghji-Arnaghji Les ruchers traditionnels de Corse, di Jean-Louis Santini edizione Alain Piazzola

L’apicultura corsa hè sempre pocu studiata in u duminiu di e Scienze Umane è Suciale pè sta forma d’allevu chì era sparta tempi fà. U fattu di publicà u pruduttu d’anni di cullette d’infurmazione cuntribuisce dunque à a cunniscenza d’un patrimoniu oramai abbandunatu à a machja è fermanu poche persone à parlanne. Jean-Louis Santini presenta schedule permettendu à tutti di cunnosce st'ernaghji ghjuvendu à accoglie è fà pruduce l’essami. A tempu, l’autore ci invita à capì l’impurtanza di e pratiche d’apicultori è di fà à prò di a salvezza di ste custruzzione perse in e terre agricule è pasturale scantate.

E carte di sintesi palesanu a densità di l’attività apicula, in particulare in u Ghjunsani è a Pieve di Caccia. Un’impurtanza chì si ritrova dinù in u scumpartimentu di i nomi di lochi è di cumune. Sò furmati à parte da base etimulogiche prelatine chì ci facenu pensà à una tradizione apicula assai anziana chì hà marcatu i paisaghji isulani è hà lasciatu vistiche in a lingua corsa. D’altrò, stu travagliu ùn hè micca solu un inventariu d’ernaghji. Dà a parolla à tutte e persone, in particulare anziane, chì anu evucatu stu mudellu d’agricultura tradiziunale durante discussione o visite.