Nutiziale culturale

I faccendini in cucina, amparà u corsu scucinighjendu

L'associu Ubiquità hà trovu una risposta pè a prumuzione di a lingua corsa ind’a vita d’ogni ghjornu, pè ch’ella ùn sia micca sempre a lingua di a grammatica ma dinù di a pratica. Vannina Bernard-Leoni, Léa Eouzan-Pieri è Ghjacumina Acquaviva-Bosseur sò dapoi una bella stonda in stu cumbattu culturale. Anu fattu rinvivì l’associu pè a prumuzione d’una lingua viva è dinamica. In stu quadru, anu decisu di creà un libru di cucina per i zitelli. Si chjama I faccendini in cucina. Ghjè u primu d’un prugettu glubale di cullezzione di libri in lingua corsa ma senza traduzzione in francese. I zitelli ponu capì e parolle cù l’illustrazione.

In st’opera illustrata da Coralie Luret-Gambotti, i prudutti sò presentati è organisati in u filu di e stagione è avemu dinù un lessicu. E sosule tradiziunale sò state riviste in modu creativu da Daniela Bieder, cucinara svizzera avendu leie cù a Corsica. In stu primu numeru, un pruduttu simbolicu hè statu sceltu: ghjè u casgiu cù tutte e so varietà Niulincu, Venachese, Sartinese, Calinzanincu, frescu o brocciu chì hè a basa di e sosule. A presentazione di u primu “I Faccendini in cucina” hè stata fatta in Corti durante un attellu direttu da Jean-Noël Corazzini, davant’à u magazinu di pruduttori A Robba Paisana cù a participazione di l'associu Casgiu Casanu è zitelli. Cusì, st’ultimi anu appruntatu e falculelle salite. Dunque, a cucina, locu induve omu si ritrova, hè dinù l’occasione d’amparà à falla in lingua corsa.