Nutiziale culturale

L’andarini, les errants di Marie Ferranti è Alain di Meglio à l’edizione Eolienne

Pè i dui autori, u Mediterraniu hè un mare ma soprattuttu una mamma. In stu libru, viaghjanu in paese di i miti antichi è sploranu cun fervore e margine di l’Odissea. Trà fola è puemu, cumponenu una trama induve si mischjanu e voce di l’innamurati di u puetu grecu Homère. In u filu di e pagine, si scontra Antinoüs chì fù unu di l’innamurati di Pénélope quand’ella era sola durante u viaghjone d'Ulysse. Dopu, Calypso, nome di a ninfa cù i capelli d’oru chì vulia spusà à Ulysse, o Circé, a maga figliola di u Sole… Dunque, un’intruspezzione passiunente in i secreti di a mitolugia.

A piazza d’Homère in a litteratura greca hè maiò per via chì riprisenta da per ellu u generu epicu chì conta un’azzione eroica. Ghjè l’autore di L’Iliade è di l’Odissea, di puemi satarichi “La bataille des grenouilles et des rats” o “Le Margitès”. Alain Di Meglio hè prufessore emeritu à l’Università di Corsica, aghjuntu à a cultura è à u patrimoniu di Bunifaziu, a so cità li hà ispiratu numerosi testi. In più di a so litteratura scientifica in u duminiu sociolinguisticu, hè puetu, nuvellistu è parullaghju di canzone in lingua corsa, bunifazinca è francese. Anzianu rispunsevule di u Centru Culturale Universitariu, hè dinù l’autore di trè racolte di puemi : Migraturi, Vaghjimi spizzati è Sintimi di sponda.

In quant’à Marie Ferranti, hè una scrittrice attalentata in leia cù a famosa casa d’edizione Gallimard. U so primu rumanzu, “Les femmes de San Stefano” hà ottenutu u premiu François Mauriac. In u 2002, hà ricevutu u grande premiu di l’Accademia francese  pè “La princesse de Mantoue”. Dopu à u so stile rumanzescu, hà diversificatu a so scrittura cù l’opera teatrale “La Passion de Maria Gentile”è à forme alternendu assaghji è dialoghi. Avemu dinù a so currispundenza cù Jean-Guy Talamoni in “Un peu de temps à l’état pur” è cù Petru Guelfucci in “Le livre de Petru”.