Nutiziale culturale

Langue corse, construction, transmission et diffusion de normes : u novu libru di Niculaiu Sorba

U corsu hà a so piazza in a storia di e lingue minuritarie. Cum’è tutte l’altre, hè arnese di cumunicazione è di creazione. U so studiu si fonda nant’à i travaglii piunieri di Marcellesi, Thiers, Marchetti, Geronimi… è purtatu da a linguistica è a sociolinguistica. A storia di a lingua corsa s’hè fatta cù u passu da l’oralità à u scrittu, l’insignamentu da a scola materna à l’università, a creazione litteraria sott’à tutte e so forme, l’affaccata d’una lingua di i media cù parolle nove. Cusì, u corsu hà evuluatu cum’è mai nanzu è a so trasmissione hè sempre in l’imbusche di sucetà, culturale è pulitiche.

U studiu di Niculaiu Sorba, risultatu d’un travagliu passiunente à longu andà, fundatu da inchieste di terrenu, esamineghja st’evuluzione è e nove sfide. Ramenta chì a lingua ùn hè micca solu un sugettu di studiu universitariu o un simbulu puru ma dinù hè l’affare di tutti. Dunque, hè ancu ella in l’imbusche demucratiche maiò di a sucetà isulana.  

Niculaiu Sorba hè prufessore di l’università in culture è lingue regiunale à l’INSPE (Istitutu naziunale supranu di u prufessuratu è di l'educazione di Corsica) di l’Università di Corsica. Membru di l’UMR CNRS 6 240 LISA, face ricerche ingiru à a situazione sociolinguistica di u corsu. I so travaglii si fondanu soprattuttu nant’à i prucedimenti nurmativi è di  standardisazione di e lingues minuritarie è/o minurisate. A so spertizia si stende dinù nant’à prublematiche didattiche. Presidente di u CAPES di Corsu assai impegnatu à prò di  u sviluppu di l’usu di u corsu in tutti i settori, cuntribuisce cusì à a valurisazione di a lingua è a custruzzione d’una sucetà corsa plurilingua.