Nutiziale culturale

Moi, Pietro Cirneo, u novu rumanzu storicu di Ghjacumu Fusina à l’edizione Albiana

Ghjacumu Fusina face rinvivì à Pietro Cirneo, u cronacu, puetu di u XVu seculu è ancu ellu alisgianincu cum’è l’autore. Hè cunnisciutu oghje ghjornu cum’è unu di i primi storichi di a Corsica. A so cronaca De rebus Corsicis hè unu di i primi capi d’opera di a litteratura isulana. Conta a storia di a Corsica, da l’origine à u XVu seculu, è ghjè una loda di l’isula è i so abitanti. Pietro Cirneo hà campatu dinù una vita d’aventure cù u bassu medievu è a so ghjente. Quella di a Corsica è di l’Italia di e cità-stati. Banditi, sgiò, preti, pirati mureschi, suldati genuvesi o aragunesi, eroi corsi chì rinviviscenu ancu elli in stu rumanzu storicu. U nome ch’ellu s’hè datu in latinu, Petrus Cyrnæus, vole dì in fatti Petru di Corsica.

L’autore Ghjacumu Fusina, prufessore emeritu di l’università di Corsica, hè cunnisciutu pè tante canzone, puemi, articuli, ecc. chì anu marcatu u muvimentu culturale di u Riacquistu. Si cunnosce ancu u so estru rumanzescu chì l’hà purtatu nant’à i chjassi di a Guerra di u 14 (Le Petit Soldat), di l’amore di a literatura fendu rinvivì un avucatu famosu (Le dossier Félix Decori)... Oghje, ci conta u so rughjone, l’Alisgiani, a Corsica di u Medievu è u famosu Petru Cirneu. Hè dinù amministradore di l’ADECEC.