Nutiziale culturale

Nous n’attendons personne (Veghja) di a cumpagnia Aime au carré, marti u 31 di marzu à 6 ore è mezu à u spaziu Natale Luciani in Corti

Ghjè una nova creazione di a cumpagnia Aime au carré, un spettaculu in lingua corsa è francese rialisatu da Misandra Fondacci. Conta a reunione di fratelli è surelle durante una veghja funebre. A prima opera scritta da a rialisatrice. Li paria dunque logicu di fanne u primu prugettu di a so cumpagnia. A brama hè nata dinù da u scontru cù i cumedianti Alizée Pinelli, Sampiero Medori, Annabelle Coti, Pierrick Tonelli è di parlà cun elli nanzu di principià qualcosa. 

Eccu a storia : « A mamma hè morta à tempu avà. Emmanuel, u primunatu, raghjunghje a so surella Paola accumpagnatu da a so sposa, Andrée, pè a veghja. Paola ùn hà mai chitatu u paese è a casa famigliale, s’hè primurata di u so babbu capunanzu, dopu a so mamma sin’à a fine. Emmanuel, ellu, hè partutu à campà a vita ch’omu aspettava d’ellu in cità. U fratellu è a surella s’adduniscenu forse pè l’ultima volta in a casa induv’elli sò ingrandati, a vigilia di l’interru. Ma, quandu ghjunghje Pacôme, u fratellu u più giovanu disprezzatu da i soii pè vighjà ancu ellu a morta è dilli addiu, l’altri principianu à sprime e so emuzione. A scelta di u plurilinguismu rispechja e difficultà di cumunicazione di i persunagi. Quandu u linguaghju hè rottu, a trasmissione hè perturbata. Cum’è sì i silenzii è ciò ch’ùn si dice micca, avessinu sguassatu pianu pianu a lingua materna. Eppuru, malgradu sta tensione, s’arricordanu chì à mumentu datu si tenianu tutti caru.