Nutiziale culturale

Nouvelle histoire de la Résistance en Corse (Juillet 40 – Septembre 43) di Sylvain Gregori, edizione Alain Piazzola

1034 pagine, tante cunniscenze è riferenze pè un sguardu novu nant’à a Resistenza in Corsica. Stu libru ricustituisce u cuntestu politico-ecunomicu-suciale di sta perioda semplice è à tempu cumplicata. Semplice per via chì petanisimu è marescialisimu s’imponenu in u paisaghju isulanu è facenu chì l’isula hè invadita da u fascisimu talianu. Ma dopu avè sustenutu à Pétain è Mussolini, e cundizione di vita è a matracchera irredentista cambianu a visione ch’elli anu i corsi di sti dirigenti è rinviviscenu u patriuttisimu corsu à prò di a Francia. D’altrò, u partitu cumunistu, pocu impiantatu nanz’à a guerra è scioltu in u 1939, hà da rinfurzassi in l’isula sana cù a creazione di u Fronte Naziunale. Hà da cunvince dinù ghjente micca cumunista pe via chì s’adatta à e brame di a pupulazione. D’altrò, ind’un isula induve e perdite umane di a prima guerra mundiale sò state tamante à u puntu chì certi paesi ùn si rimettenu, l’anni 40-43 vedenu affaccà una giuventù curagiosa chì s’impegnerà assai in a Resistenza. Un fenomenu rimarchevule chì si pò lià à l’affaccata di i giovani in pulitica durante l’anni 70 è in u Riacquistu.

Sylvain Gregori, autore è direttore di u museu di Bastia, hà sceltu u titulu d’una nova storia di a Resistenza in Corsica per via chì dapoi « Tous bandits d’honneur » di Maurice Choury publicatu in u 1956, rieditatu in u 1988, ùn ci hè più stata paruzione nant’à a Resistenza quì.  U libru di Choury era cunsideratu cum’è una bibbia nant’à stu sugettu ma a so publicazione hà fattu nasce pulemiche à u partitu cumunistu trà u nordu è u meziornu di l’isula. Sylvain Gregori hà studiatu l’epuca di Vichy pè cunnosce megliu u cuncettu di resistenza. Cusì, stu travagliu hà permessu di valutà megliu è di precisà cumu i cumunisti anu impostu a so duminazione frà i resistenti cù una prupaganda versu i corsi fundata nant’à a scuntentezza suciale di tandu è l’identità corsa. PC è Fronte Naziunale anu furmatu una pulitica chjara contr’à u guvernu di Vichy è l’occupante talianu tenendu à contu i prublemi materiali è vitali di i Corsi chì straziavanu per via di Vichy è di l’occupante.