Nutiziale culturale

Omagiu à Marie-Jean Vinciguerra mercuri u 21 di ghjennaghju à 6 ore, Bibliuteca Tommaso Prelà di Bastia

In u 2023, Marie-Jean Vinciguerra si n’andava à l’altru mondu. Omu di lettere, scrittore, puetu di prima trinca in parechje lingue, premiu di u libru corsu in u 2013 pè u so libru “Bastion sous le vent”. Impegnatu ind’a vita pulitica lucale, anzianu cunsiglieru generale, candidatu à a merria di Bastia, cunsiglieru regiunale ind’a prima assemblea di Corsica. Autore di parechji libri, frà elli u numeru 7 di u Memuriale di i Corsi (scrittu cù Jean-Marie Arrighi) è difensore impegnatu di a lingua corsa. Scumbattia sempre pè a prumuzione di a cultura corsa ch’ellu vulia aperta nant’à u mondu. Ellu stessu hè statu seduttu da e civilisazione orientale (Tailanda), africane (Burkina-Faso) è latino-americane (Culumbia).

Era dinù Cavalieru di a Legione d’onore è di l'Ordine naziunale di u Meritu. A so voce hà animatu a vita culturale di a nostra isula. François-Xavier Renucci è Norbert Paganelli di A Casa di a Puisia li renderanu omagiu mercuri u 21 di ghjennaghju à 6 ore in a sala d’animazione, secondu pianu, di a Bibliuteca di Bastia in u quadru di u libru « A Siam » (rieditatu in u 2025 à l’edizione Le Bord de l’Eau-Spondi). Sò previste una cunferenza è letture publiche nanzu a presentazione di stu libru cuntenendu e so trè prime racolte chì ùn si pudia più truvà.