Nutiziale culturale

Orsulinu, una fola pè tutti di Guy Maestracci

Viaghju iniziaticu è pueticu d'un orsulinu nant'à i chjassi di l'amore, di e so gioie è di e pene. Un'apa è un orsulinu... Ci hè da esse surpresu ma pè dui cori aperti ùn ci hè nunda d'impussibule. A prima pena d'amore face nasce in noi una mansa di sintimenti, di speranze, di dillusione, di dubiti è di certezze. Ci seranu risposte à ste dumande ? Induve ? Stu libru filosoficu cuncerna i zitelli da 7 à 99 anni è trasporta i lettori in l'universu di a puesia, di i simbuli è di l'universalità. Sì i persunagi sò animali, sta filastrocca ferma assai umana. Orsulinu, Ragazzina, u cignalottu, u ciocciu, Filosa a cerva è l'altri, vi feranu viaghjà in decori nustrali è imaginarii di l'isula cù un libru di 68 pagine scrittu in corsu è francese, illustratu è culuritu.

Guy Maestracci, eternu zitellu sunnione è passiunatu hà tenutu a penna. Marie Ciavaglini, studiante à a scola preparatoria d'Arti plastichi di Sartè, hà pintu cù u so imaginariu. L'adattazione in parlatu sartinese hè l'opera di Vannina Lari. William Bouzik hà infilatu u so topu in un travagliu d'impaginatura cù culori luminosi. Jean-Baptiste Raimondi hà sappiutu animà u filmucciu di stu libru. A voce hè quella di Laetitia Herbert - Ficaja cù l'ochji di Jean-Jacques Cangioni, Dominique Colonna è di Marie-Dominique Predali. Sì vo vulite aiutà à stampà Orsulinu, sappiate chì, s'ellu hè un successu, puderete cuntrbuì à rializà un spettaculu vivu, mischjendu puesia, musica, cantu, narrazione, imaghjina è video.

Di più infurmazione : https://www.move.corsica/fr/orsulinu