Nutiziale culturale

Stracci di mimoria, novu libru di Ceccè Lanfranchi

U famosu prufessore di corsu, cantadore, militante puliticu è culturale hà esciutu u so ultimu librettu « Stracci di mimoria » à l’edizione « Le Parti des Oiseaux ». Ci vole cusì cuntà qualchì passata di a so vita arrimbata à una manera d’esse è un campà chì, per disgrazia, spariscenu à pocu à pocu… U talente di cantadore è pueta di Ceccè Lanfranchi, tuttu u mondu u cunnosce in Corsica. À tempu, e so cumpetenze in lingua corsa (insegna dapoi più di trenta anni), ùn sò più da verificà. A scrittura face dinò parte di a so attività. Quelli chì u cunnoscenu a sanu ch’ellu hà participatu dighjà à parechje publicazione (Da l’immersu à l’eternu 1994, Parulle d’oghje 1989, A via d’ochji…) è d’altre opere in cumunu cù amichi...

Scrive à modu soiu per parlà di a so zitellina, eccu ciò ch’ellu hà vulsutu fà cù « Stracci di mimoria ». « Aghju vulsutu trattà di a me ziteddina, spiega l’autore, ma dinù quand’eru ghjuvanottu, tutti issi tempa ch’aghju campatu in paesu. Ci era a vulintà di lacà una traccia, per ùn perda tutti issi mumenti passati. Ch’eddi siani campati parsunalmenti o cuntati da i nosci vechji... » Natu in Livia in u 1965, hè vera chè Ceccè Lanfranchi hà passatu guasgi trenta anni in u so paese. Dopu à una scularità in Livia è Sartè, sbarca in Aiacciu in u 1989 per un primu postu di prufessore di corsu. Nanzu, n’averà passatu tempu à ascultà l’anziani, à sente tanti è tanti ricordi, mumenti di vita... « Hè un pocu di tuttu issu campà ch’aghju vulsutu metta in issu libru. Ma u versu hè più vicinu di l’uralità cà d’un usu litterariu... » I quartieri di a so zitellina, u caffè, l’anziani, l’esse, a manera di campà, a ruralità, a trasmissione, eccu un pocu di e tematiche ch’ellu prupone nantu à u so libru. « Ùn ci voli micca pinsà chì nanzi a vita era meddu ch’avali, ciò chì mi tocca assai è di veda ch’una civilisazioni spariscia. C’era una leia suciali è un essa chì si ne vani à pocu à pocu... » Sò, l’averemu capitu, ricordi di iss’omu chì si vole fà, d’una certa manera u testimoniu d’una vita chì si ne và. « Ùn si puderà cambià u mondu è ùn era u me scopu cù stu libru, solu una manera di risponda à un’evoluzioni di a sucetà corsa ch’ùn currespondi più à quidda di nanzi… » Eccu un pezzucciu d’issa vita campata in Alta Rocca è mintuata nantu à l’opera di l’artistu. « I stundi scritti chivi, issi minuti di posu nantu à u zuddu t’ani un sapori à nisciun’altru paru. È ùn socu mancu parchì. Ma quand’idda mi vena à menti, issa musichedda di quiddu tandu, mi vicu rinascia altru...Mi vicu rinascia com’è ùn socu più in un mondu ch’ùn hè più... »

Più ch’un libru, hè un usu, un sapè fà, una vita chì sò mintuati quì. Una manera, à tempu, di lascià u qualcusellu chì ferma per e generazione à vene. O di guardà parte un mondu chì sdrughje… Un libru chì, di sicuru, tuccherà assai tutti quelli chì anu sempre, in core à elli, « stracci » di vita cum’è quella di Ceccè Lanfranchi. Un libru dispunevule, per avà, in Aiacciu (Vibrations, La Marge, a libreria di i Palmiers, FNAC Aiacciu è Baleone, nantu à u situ partidesoiseaux.net, è forse, dinò, da quì à pocu in Corti è Bastia. L’artistu, ellu, publicheghja un’altra opera, in cumunu sta volta : I Brandali cù Ceccè Ferrara è Saveria Valentini...

Origine : https://www.journaldelacorse.corsica/