Nutiziale culturale

U numeru 7 di Raconti “St’animali ùn sò cusì scemi-ces animaux pas si bêtes”, edizione Maia-Matina Latina

L’aventura hè principiata in u 2014, in Oran, in Algeria, durante u Festivale internaziunale di a fola à a crucivia di i chjassi. Claude Franceschi è Amélie Raffaelli eranu stati surpresi di sente un togolese cuntà una storia tradiziunale di u so paese chì s’assumigliava à a fola corsa ch’elli avianu previstu di cuntà subitu dopu à ellu ! Cusì principiava l’aventura di a seria Raconti à u crucivia di i culturi. Oghje ghjornu, tocc’à fine cù 11 anni di ricerca, 630 fole cullettate, 418 testi publicati grazia à parechje centinaie di cullaburadori. Frà elli, Brigitte Peraldi-Grimaldi,chì presenta stu numeru 7 : « Dapoi i tempi di i tempi, i destini di l’animali è di l’umani sò liati nant’à a Terra. Sta Terra induve stanu tante cumunità umane cù e so mitolugie, legende è fole. I raconti presentati quì facenu di l’animale un « persunagiu litterariu » ; ch’ellu sia un aiutu, cumpagnu di sfurtuna di l’umanu, ma pò esse dinù u so nemicu o quellu chì u fughje quandu l’animale crede chì l’umanu hè periculosu per ellu. Sò animali oghjinchi, mansi o salvatichi, mitologichi, strasordinari, chì parlanu, o chì anu cumpurtamenti umani.

Sti Raconti di a nostra isula palesanu dinù una volta di più i ponti secreti chì i leianu à fole è legende di u mondu sanu. In u filu di e pagine « A volpe di Biguglia » hè à fiancu à « A volpe è u lupu di Russia », « U sumere corsu chì hà betu a luna » s’accanaglia cù «U sumere gascone di Montastruc », u rusignolu corsu canta cù l’acelli cureani…. Sì l’autori compienu u so libru di fole cù stu numeru VII, a seria di i «Raconti – in paesi / Au village », principiata in u 2021, si pruseguerà cù u numeru VIII nurmalmente st’estate.