Nutiziale culturale

U Parulaghju, Lessicu di paroli persi o scunnisciuti di Paulu Desanti à l’edizione Albiana

Eccu quì una mansa di parolle firmate urfanelle chì ùn eranu in nisun dizziunariu. Trove in i puemi, raconti, nuvelle, rumanzi, Paulu Desanti l’hà addunite in U Parulaghju, cù e so definizione è citazione. A so particularità hè d’esse aduprata soprattuttu in Pumonte, qualsiasi e varietà. U primu scopu di stu libracciolu hè di rammentalle è u secondu saria di cuntribuì per dumane, fussi incù mudestia, à l’assestu di un dizziunariu corsu puri puri cumpletu. L’autore Paul Desanti hè prufessore è autore di lingua corsa. Hà publicatu numerose racolte di nuvelle è di teatru, frà quesse 'Fiaschi è altri scumpienti' (Albiana/CCU, 2020), 'Semu lecchi'… (cù Filippu Guerrini, Albiana/CCU, 2023). 

A racolta di u vucabulariu corsu, principiata toccu a fine di u XIXu seculu cù Falcucci è dopu cù a squadra di U Muntese è tant’altre, fubbe un travagliu tamantu cù a fede è l’amore prufondu di a lingua nustrale. Eppuru, parechje parolle, truvendusi in lessichi di mistieri o d’attività particulare, oghje sparite cù u cambiamentu suciale, mancanu sempre. Unepoche si ritrovanu in libri è meritavanu d’esse in u dizziunariu di a lingua corsa cum’è stu Parulaghju.