Nutiziale culturale

Veranu di i pueti: terza chjama à testi da a Casa di a Puisia

A Casa di a Puisia manda a so terza chjama à testi in u quadru di a 25a edizione di u veranu di i pueti. U tema quist’annu hè “Fruntiere”, temu naziunale di a manifestazione. I testi in lingua corsa o francese ponu esse mandati à a Casa sin’à u primu di marzu. L’indirizzu mail hè casadiapuisia@laposte.net 

A Casa di a Puisia hè stata creata in u 2020 da Jean-Jacques Colonna d’Istria è Norbert Paganelli. Sta casa hè, seguitendu a nomenclatura di a CDC, un laburatoriu culturale chì l’ogettivu hè di prumove a puesia nant’à u territoriu isulanu. Hè cumpostu d’un cunsigliu strategicu di 33 membri pueti, pittori, musicanti, insignanti di Corsica è d’altrò.

In più di stu cuncorsu annuale è a publicazione d’un libru in leia, a casa hà rializatu una perfurmenza artistica cù pittura, ritrattu, arti di a scenza è novi media di settembre 2022. Sò dinù i creatori d’una stela metallica chì serà stallata à u campu santu di Zarzis in Tunisia in omagiu à e persone vittime d’un affondu cù un testu magnificu di Ghjuvan Federicu Terrazzoni. D’altrò, più di 200 libri di puesia sò stati rigalati à l’associu Inseme. Anu messu dinù in piazza parechji chjassi puetichi in cullaburazione cù e municipalità. Organizeghjanu i scontri cù i pueti isulani cum’è a ghjurnata Puetissimu, l’annu scorsu in Travu, è cunferenze cum’è un cullocchiu nant’à l’avvene di a puesia di nuvembre 2022.

Durante e duie ultime edizione di u cuncorsu annuale, quasi 200 persone anu participatu è a qualità di i testi hè stata rimarcata. I testi ghjunghjianu d’America, d’Africa, di u Maghreb è d’Europa centrale… In quant’à i puemi in lingua corsa, i premii di l’annu scorsu sò stati attribuiti à pueti principianti. A cumediante Nathalie Japiot hè stata premiata pè u so bellissimu puemu : Temps-Dance. Pè a puesia corsa, ghjè a squadra d’Aiò, un gruppu di 6 donne ch’hà scrittu un’opera cullettiva in a tradizione di l’operata. Travagliu fattu in cumunu è di rigalu à prò d’una persona, d’una famiglia o di a cullettività. Cusì, stu cuncorsu aiuta à fà megliu cunnosce a puesia vicin’à u publicu è à tempu aiutà i pueti à fassi cunnosce.