Nutiziale culturale

“Tant'anni fà', Purettu, Pozzu, Frisculacciu, Lavasina' di Michel de Peretti à l’edizione Aedis

Un sguardu nant’à l’evuluzione è i cambiamenti accaduti in certi paisoli di  a cumuna di Brandu. Una testimunianza nant’à a vita di tant’anni fà studiata à livellu agriculu, artigianale, allevu, sculare, i trasporti, e feste religiose, a Settimana Santa… cù numerosi ritratti. 'E cumunità di Purettu, Pozzu è Frisculacciu avianu un’attività pè u più agropasturale cù qualchì attività cumerciale. A pupulazione era aperta nant’à u mondu grazia à i marinari ma pruducia pè u più da per ella ciò chì l’abbisugnava. Oghje ghjornu, sì a pupulazione brandinca hà duppiatu, solu un terzu di l’abitanti ci campa dapoi parechje generazione. 

Michel de Peretti hè testimone d’una sucetà paisana quasi sparita, ùn hè micca scrittore, nè puetu o rumanzeru. I cambiamenti principiati à parte da u 1950 si facianu pianu sin’à u 1970. Dopu, più in furia. A diaspora hè vultata in Brandu à mumentu di a so ritirata ma quasi più à parte da u 2000. Ancu di grazia, giovani è menu giovani di Brandu o d’altrò facenu rinvivì tradizione religiose o prufane dapoi qualchì annu. Stu libru ghjova à mantene a memoria di ste donne è omi attori di a storia lucale pè trasmettela s’ellu hè pussibule. Forse chì ste case anziane, sti stazzi, palazzi, chjassi spariti in machja, lochi ch’anu vistru strazià i paisani, funtane, pozzi, oghje vioti, canalette, nomi di lochi, ùn sò micca solu un paisaghju, un ambiente pitturescu ma ch’elli ci parleranu di a vita di i nostri anziani, pè campà megliu oghje è dumane senza scurdassi di i drami è stonde addulurate.