Nutiziale culturale

U tumbinu di i Rivarola hè una cappella funeraria eretta nant’à a culletta di Muzzelu, in Cismonte. Si pò vede da u paese d’Oletta è i paisoli di i circondi. I membri di sta famiglia corsa appartenenu à a legenda di l’isula è certi anu avutu destini eroichi in a storia di l’Europa. I Rivarola sò quì. S’affaccanu cù i so dubiti è interrugazione, e so angosce è e so debulezze, ma dinù a so forza è u so curagiu, a so grandezza, a so fede, speranza è carità. In stu libru, ùn sò più in a legenda ma ridiventanu esseri di carne, di sangue è di lume.

 

L'autore Eugène Gherardi hè amministradore di l’ADECEC, direttore di u laburatoriu LISA (Lochi, identità, spazii è attività, solu laburatoriu in scienze umane è suciale di a Corsica. Hè prufessore di l’università in culture è lingue regiunale, presidente di a sezzione di listessu nome in u Cunsigliu Naziunale di l’Università. Travaglia nant’à a storia culturale di a Corsica è ghjè l'autore di numerosi libri nant’à a storia di l’educazione è a rilazione trà e tradizione sapiente è a cultura pupulare in l’universu litterariu da i Tempi Muderni à a perioda cuntempuranea.