Nutiziale culturale

Dialogues de la Corse préhistorique antique et médiévale. Une histoire mondiale de la Corse

A storia di a Corsica cum’è ùn l’avete mai letta ! 

Ziu Petru è u so nipote Federicu evucheghjanu in i so dialoghi a storia, l'archeolugia, l'etnolugia, a suciulugia di a nostra isula. Dunque, ùn hè micca una Storia di a Corsica cum’è l’altre ma un dialogu è una storia mundiale di l’isula. 

Avendu trovu l’infurmazione inde e migliore fonte di a ricerca attuale, i raconti di Ziu Petru presentanu a cunniscenza storica a più precisa pè cuntà a storia, trasmettela, rammentà chì st’ultima ùn hè micca solu evenimenti è date ma chì hè dinù u fruttu di i populi, ch’ella hè impastata di i so modi di vita, di e so culture è di i so raporti à u territoriu. E chì nunda esiste senza u raportu cù u restu di u mondu cù l’intruduzzione di e tenniche nove dapoi u neoliticu, innuvazione lucale, cumerciu di i bè, circulazione di l’idee…

A storia di a Corsica è di i Corsi hè straordinaria. Quì s’intreccianu destini di pastori, di paisani, di marinari, militari, scrittori, scrittrice, scientifichi, ghjente di u populu, aventurieri… Ghjente di prima trinca. Da u paleoliticu à u Medievu tardivu, ognunu à modu soiu hà lasciatu a so vistica : una punta di frezza, un vasu in terra cotta, un castellu, un racontu... Ognunu hà lacatu una parte d’ellu stessu à a storia di l’isula. Dopu, i storichi anu racoltu e tracce, pè capille è trasmettele. Cusì, Federicu stà à sente u so ziu pè cunnsoce sta storia : quella di i Corsi, di a Corsica è di u mondu.

L’autore, Pierre Saly-Giocanti, natu da una mamma corsa è da un babbu catalanu, hè agregatu di storia, duttore in scienze ecunomiche. Hà insignatu a storia à e studiente è studianti chì devianu presentassi à i grandi cuncorsi di ricrutamentu di l’Università Panthéon-Sorbonne. Specializatu in storia macroecunomica cuntempuranea, hà sempre avutu un sguardu attente à l’evuluzione di e sucetà mediterranie di a Prestoria sin’à a nostra epuca, in particulare in Corsica induv’ellu campa a metà di l’annu.