Nutiziale culturale

Premiu di i lettori di Corsica pè José Carducci è Camille de Peretti

In lingua corsa : 'Di petre è di sangue' di José Carducci à l'edizione Cavallucciu
In lingua francese : 'L’inconnue du portrait' di Camille de Peretti, edizione Calmann-Levy

U premiu di i lettori di Corsica hè statu creatu da a Cullettività di Corsica pè prumove a lettura publica è dunque a leia suciale. A ghjuria ùn hè micca un'addunita d'esperti o di persunalità ma d'usageri di bibliuteche isulane iscritti in circuli di lettura animati da i servizii di lettura publica di a CDC è da agenti municipali di bibliuteche o benevulenti. Permette di dà un altru avisu ch'è quellu di i grandi premii naziunali nant'à l'attualità litteraria di u rumanzu.

'Di petre è di sangue” conta a storia rumanzata di a famiglia di l'autore José Carducci. I genitori Félicité, Ours è a so discendenza. Ci hè quì l’omagiu di u scrittore à a so lascita famigliale è un ramentu di l’evenimenti di u vintesimu seculu in Corsica. Omagiu dinù à a prufessione di cavapetre, à u mondu minerale è à a Corsica muntagnola. Stu libru, rieditatu parechje volte, hè statu un successu. I lettori cumossi si ricunnoscenu in i persunagi è paisaghji descritti pè un viaghju sputicu ind’una Corsica chì ribomba cù nustalgia è emuzione pè parechji. 

In 'L’inconnue du portrait' di Camille de Peretti, si tratta d'una pittura di Gustav Klimt, 'Portrait d’une dame'. Pinta in Vienna in u 1910, l'opera hè compra da un cullezziunadore anonimu in u 1916, arrubbata in u 1997, nanzu di ritruvassi in u 2019 in i giardini d’un museu d’arte mudernu in Italia. Nimu sà quale a donna riprisentata in sta pittura, nè i misteri nant'à a storia turbata di u so ritrattu. Dunque, da i carrughji di Vienna in u 1900 à u Texas di l'anni 1980, da u Manhattan di a Grande Depressione à l’Italia cuntempuranea, Camille de Peretti imagineghja u destinu di sta giuvanotta è di i so descendenti. Un affrescu di prima trinca induve si mischjanu secreti di famiglia, successi, amori cuntrariati, sparizione è drami maiò.