Nutiziale culturale

Hè esciutu u sestu Raconti in paesi-au village, Matina Latina, edizione Maïa

Da Lucia Santucci : Una volta di più, stu numaru di Raconti ci face vive un sintimu stranu : quellu di u ritornu in casa soia. Ci paria d’esse una parte di u mondu è puru eramu in esiliu. Sta racolta di puesie, leghjende, stalvatoghji, strufulette è pruverbii si face viaghju di l’indentru, di u ritornu, granitula di mimoria. Racolta di tanti è tanti paesi da Cismonte à Pumonte, da Bunifaziu à Capicorsu, stu viaghjone ci porta à guardà a nostra vita cume a pussibilità di truvà risposte oghjinche indè a savviezza antica. Circavamu ciò chè no aviamu persu… simu per istrada… basta à porghje a manu è arriguarà si ogni petra o pitricella per i chjassi nustrali. St’ultimi raconti diventanu petre preziose di a litteratura pupulare. Sò una lascita chjara ma pisia, femu ne cullane di tramandera da sparte per stà sempre in leia incù u racontu maiò di l’Universale.