Nutiziale culturale

Isabelle Latour : a rilazione di Pasquale Paoli cù e donne

A direttrice di u museu di Merusaglia ci insegna chì u babbu di u Patria ùn hà micca datu u dirittu di votu à e donne in a so Custituzione di u 1755. In fatti, e donne votanu dapoi u sedecesimu seculu, durante a Corsica genuvese. Ma ùn si trattava micca di fà avanzà u dirittu di e donne cunsiderate “incapace” passendu da l’autorità paterna à quella di u so maritu in u quadru di u matrimoniu. Dunque, pudianu vutà solu e donne avendu omancu 25 anni, veduve o chì u maritu era assente. Paoli mantene stu dirittu in a so Custituzione è e donne ponu participà à e cunsulte. Ind’a rialità, poche donne votanu è quandu a Corsica diventa francese, ùn votanu più. Hè di più interessante di sapè chì Paoli hà decisu misure pè prutege l’orfanelle in fattu di i diritti patrimuniali nant’à e successione o cundannendu à morte e persone chì tombanu e donne.

D’altrò, u Babbu di a Patria hà currispundutu cù donne putente di u 18u seculu cum’è e regine Marie-Antoinette, Catalina 2 di Russia, partigiana di u generale è chì vanta a so grandezza d’anima è a so generusità pè difende a so patria. Hà currispundutu dinù senza avella mai scontra cù a storica inglese Catharine Macaulay chì li hà mandatu un prugettu di custituzione pè a Corsica. Hà frequentatu dinù e serate musicale di Maria Cosway. Incantata da sta donna assai bella, a cugnumeghja a so decesima musa. Nome rimandendu à e nove muse di l’alloghju massonicu. Durante più di vint’anni, Maria è Pasquale currispondenu nant’à l’arte, u teatru, a litteratura, a musica. Dunque, una vera cumplicità intellettuale. Paoli era innamuratu d’ella è a li face sapè in e so lettere. A rilazione trà i dui persunagi si piantava quandu Maria Cosway li raccumanda di dumandà a citadinanza francese à Napulione, primu consule à quell’epuca. Infine, si sà dinù ch’ellu era un bellu omu struitu, ben educatu, ch’ùn s’hè mai maritatu è ùn era affigliulatu.