Nutiziale culturale

Un prugettu di mostra nant’à a cunsulta di Caccia

Quasi 270 anni fà, i 21 è 22 d’aprile di u 1755, a pulitica di a rivuluzione corsa contr’à i maestri genuvesi s’invitò à u cunventu San Francescu di Caccia nant’à a cumuna di Castifau. Sta cunsulta hè una stonda cunnisciuta da i storichi è i passiunati ma micca troppu da u publicu. Cusì dice Didier Ramelet-Stuart chì hà fundatu e so ricerche storiche amatrice nant’à a cunsulta di Caccia. Ci hà participatu Pasquale Paoli vultatu dui ghjorni nanzu da u so esiliu napulitanu.  Sta cunsulta hè l’iniziu di a cunsulta di Casabianca di lugliu 1755 chì eleghje Paoli cum’è generale di a nazione è di quella di Corti, di nuvembre di u listessu annu, chì face aduttà a Custituzione corsa. Durante a cunsulta di Caccia, gruppi di travagliu di deputati trattanu di quistione custituziiunale cum’è a manera di rende a ghjustizia o ancu a gestione di i danari publichi.

Un scrittu di sta cunsulta si trova in Corsica in u Fondu Paoli è n’esiste un altru in Italia, in l’archivii di Statu di Torino. A quell’epuca, parechji esempiari sò stati mandati in l’Europa sana pè insiste nant’à l’impurtanza di l’evenimentu è a vuluntà di stabilì una nazione ricunnisciuta. In u 2025, u 21 d’aprile hè un luni di Pasqua. Pè l’occasione, a merria di Castifau, a CDC, l’associu di salvamentu di u cunventu San Francescu è a Fundazione di u Patrimoniu approntanu una merendella particulare in piaghja di Multifau. I participanti puderanu visità una mostra speciale nant’à a cunsulta di Caccia, trasferita dopu in Castifau è infine à u museu di Merusaglia. Serà una di l’azzione in u quadru di i trè centu anni di a nascita di Paoli. D’altrò, u cunventu di Caccia ferà parte di a seconda fasa di a Strada Paolina. Un itinerariu pedagogicu è turisticu permettendu a messa in risaltu d’edifizii rimarchevuli cù un doppiu ogettivu : una lettura storica è patrimuniale è à tempu a valurisazione di a Castagniccia.