Nutiziale culturale

U numeru 91 di a rivista Etudes Corses

I rispunsevuli di sta rivista pensavanu dapoi una bella stonda à un numeru nant’à l’isula cum’è sugettu d’ispirazione litteraria. Oramai hè fatta ind’una pruduzzione feconda è varia. Capunanzu, ci vulia à precisà u sugettu di ricerca nant’à una litteratura pè u più francufona. U sugettu hè troppu stesu pè stendelu à altre lingue. A lingua corsa da per ella hà l’argumentu è a materia d’un numeru specificu chì serà sicuramente cumentatu da specialisti à mumentu datu. 

A Corsica hè entrata prestu prestu ind’a litteratura o forse serà u cuntrariu… Sia ch’ella sia, u fenomenu hà principiatu à l’Antichità pè un’abbundanza litteraria chì hà cunvintu i spiriti pè ghjunghje ogni tantu à temi caricaturali è pisivi chì si piantanu à l’epuca di u Riacquistu. Cusì, i primi rumanzi sò scritti à tempu à i raconti mischjendu finzione è biografia. U rumanzu pulizzeru s’accorda cù l’aventure teatrale d’Olmi-Cappella… Face chì tutti st’elementi fissanu u presente è cumponenu a diversità litteraria di un’isula girata versu a mudernità ma senza banalità.