Nutiziale culturale

L'Oriu di i Lestrigoni

Escerà per Natale u quartu tomu cù dischettu è libru di e storie di 'Pirru è Ricuccata': 'L'oriu di i Lestrigoni'. Sta volta, l'orsu è a tupinetta portanu i so passi in terra di a Rocca, di l'Avretu è in Bonifaziu per seguità a so questula di u Cornu Sacru arrubatu da u gattivu Pinzachju... Ci cunducenu nantu à e strade di u patrimoniu isulanu à a scuperta di i nostri paesi è di i so lochi di storia, da Santa Lucia di Tallà à Purtivechju passendu per Carbini o Cucuruzzu. A musica muderna hè cumposta da Bernard Ferrari, ispirata da canzone tradiziunale o oghjinche. D'altrò, a squadra hà sceltu d'offre duppiami in lingua di i rughjoni scuperti. Cusì, si puderà stà à sente e voce tremende è cunnisciute di Don Mathieu Santini (a zinevra), Natali Valli (l'asinu /u sumere), Alanu Di Meglio (u purpu, u polpu) è di Ghjuvan'Federiccu Terrazzoni (a biciartula/l'aciartula) arregistrate è mischiate da Julien Muraccioli (Carmina Studio in Bastia).

A scumessa hè questa quì : una narratrice, Anna Rocchi, ci conta a storia mentre i persunaghji parlanu a so varietà lucale di lingua corsa, prisente nantu à i territorii di a storia. Sti novi persunaghji anderanu à l'incontru di Pirru (duppiatu da Paul Turchi-Duriani) è di Ricuccata (duppiata da Doria Ousset), sempre aiutati da u Magu (campatu da Frédéric Antonpietri dettu 'Tonton'). Senza scurdassi di u gattivu Pinzachju (duppiatu da Anghjulu Mari). In terra di i Lestrigoni, purteranu i zitelli è i maiò, nantu à u filu di una storia colma di canti, di risa, di murale, d'insignamenti è di legende cum'è quelle storie antiche dette in giru à u fucone. Torna un'altra volta, u creatore di ghjocu video Fab Mariani impresta u so talentu à u libru, affiurendu u contu, a favula è a so parte pedagogica induve omu puderà scopre l'animali endemichi è i lochi patrimuniali visti in u libru messu in pagina da Sébastien Moretti (studio WMI in Carghjese).

Cù l'aiutu amichevule di RCFM è di a Cullettività di Corsica, l'Edizione Realità anu previstu una cullezzione di 6 libri da quì à u 2023 è prugetti culturali zitellini cume spettaculi di mariunette o ancu una fiura mossa. Cù u successu trovu per e scole di l'isule, u primu libru (U cornu sacru) hà ancu vintu u premiu 'Leghje Eleghje' (CDC) di i sculari corsi. I libri si trovanu in e librerie di Corsica o nant'à u situ di l'Edizione Realità : www.realita.corsica. Un libru vivu, una lingua viva, un arnese pedagogicu chì tramanda a nostra cultura. Un bellissimu rigalu per Natale !