Nutiziale culturale

Sestu cuncorsu Altaleghje in lingue corsa è francese

Nanz’à l’edizione 2022 di u so festivale litterariu « Lire le monde », l’associu Altaleghje urganizeghja a sesta edizione di u so cuncorsu di nuvelle in lingua corsa è francese sin’à u 15 di maghju. Cuncorsu pè i zitelli è i maiò. Quist’annu, a natura hè un’altra volta à l’onore cù u tema « De l’eau dans tous ses états - Acqua in tutti i versi»

U scrittore algerianu Yasmina Khadra scrivia « Ci vole sempre à fighjà u mare. Ghjè un spechju chì ùn ci dice bugie ». Sarete cum’è ellu, à fighjà u largu, o piuttostu à stà à sente u cantu di i fiumi? Pensate à l’incuntrariu chì l’acque sò un periculu per via chì si paranu tuttu. Aviate pensatu chì i libri sò cum’è fiumi, annacquanu e nostre imaginazione, purificheghjanu e nostre piache è sò fonte d’appaciamentu è di saviezza.

Sia ch’ella sia, « Lire le monde » prupone à i passiunati di scrittura, lettori, sunnioni o curiosi di cuntà e so storie d’acque. A ghjuria hè cumposta di Dominique Memmi, scrittrice, Alain di Meglio, vicipresidente di l’università di Corsica, è di parechje persunalità di u mondu litterariu è musicale, corsufone è francufone. Jean-Charles Papi, artistu è prufessore di litteratura, u scrittore franco-algerianu Yahia Belaskri, i vincidori di l’edizione 2021 : Stella Emmanuelli, Francesca Poli, Pierre Pirotton, Bruno Ginoux, è Marie Guerini, membra di u cumitatu edituriale di u festivale.

Stu cuncorsu hà da attribuì dinù un premiu di i lettori di e bibliuteche in cullaburazione cù e mediateche è bibliuteche di Bunifaziu, Pruprià, Petretu-Bicchisgià, Olmetu è nurmalmente Purtivechju. Di ghjugnu, l’aderenti di sti stabilimenti culturali puderanu leghje e nuvelle finaliste è vutà pè u so testu preferitu.

Durante u cuncorsu, Altaleghje prupunerà à i participanti di ritruvà nant’à Facebook è Instagram risorse è appuntamenti.

 I testi, ùn pudendu francà i 6 000 segni (spazii è puntuazione cumpresi), ponu esse scritti in corsu o in francese.  6 nuvelle seranu ricumpensate. Devenu esse mandati nanz’à u 15 di maghju à concoursaltaleghje@gmail.com. Rinsignamenti : 06 11 20 23 51 è https://altaleghje.com/le-concours-2