Nutiziale culturale

Ghjunta in Corsica, a prufessora Logambal Souprayen-Cavery hè vultata nant’à l’imbusche è l’ostaculi di u bislinguismu sculare à a Reunione induve a situazione ùn hè micca cum’è a Corsica.

In a so isula, 70 per centu di i zitelli in prima sezzione anu u creolu cum’è lingua materna, si parla assai creolu in a vita oghjinca. Ci sò 480 insignanti bislingui, è ogni annu ci n’hè una quarantina di più. Ma solu 60 classe bislingue. U dispusitivu si fonda nant’à a scola materna. Dapoi l’annu scorsu, l’accademia hà annunziatu una pulitica linguistica glubale pè un’amparera da a scola materna à u liceu ma micca obligatoriamente cù u bislinguismu. U creolu aiutà dinu à amparà u francese. U bislinguismu favuriseghja e cumpetenze in e duie lingue. Cum’è in Corsica, sta lingua nanzu hè stata disprezzata. Si cridia ch’ella impedia d’amparà u francese. Quandu un zitellu sente a so lingua materna in scola, si ricunnosce, si sente legitimu. Valurisà a lingua creola in scola ùn hè micca solu una scelta pedagogica ma dinù un’imbusca culturale è identitaria. Cum’è in Corsica, i reunionesi dumandanu a ricunniscenza di u so patrimoniu linguisticu è di a so storia. A so lingua hè di più parlata chè u corsu in a vita suciale è, à sente sta prufessora, e duie isule ponu veramente cullaburà. Amparà i so metudi, avvicinamenti è arnesi pè amparà corsu è creolu. A prufessora hà amparatu in Corsica pratiche interessante.